MANILA - Dinalaw ng ABS-CBN.com si Edu Manzano sa last taping day niya sa “Pilipinas, Game KNB?” noong Lunes.

Sa aming pagpunta sa studio ay napanood din namin ang masayang pagsasama-sama ng mga previous winners na muling naglaro para sa victims ng bagyong Pepeng at Ondoy.

Bukod sa kasiyahang ito, mas naging espesyal ang araw na ‘yon para kay Manzano dahil matapos ang ilang buwang absence sa Umagang Kay Ganda (UKG) ay muli siyang nagbalik sa kanyang early morning hosting stint that same day. If we can still remember, Manzano left UKG when he decided to concentrate more on his job as chairman of the Optical Media Board (OMB).

Matapos na siya ay mag-resign bilang OMB chairman at nag-season ender na rin ang kanyang sikat na game show, diretsahang tinanong namin si Manzano tungkol sa balitang pagtakbo umano nito sa darating na 2010 elections bilang senador.

Isa raw kasi siya sa pinagpipilian ng partido ni dating pangulong Joseph Estrada na maging bahagi ng kanilang senatorial candidates.

“Well, pinag-iisipan pa rin. Marami ang nago-offer, maraming dapat pag-isipan,” seryosong pahayag ni Manzano.“ Kung ire-rate ko? 85% siguro ‘yong kung tatakbo man ako at 15% yung hindi pa sigurado kasi may mga bagay pa ring kailan kong isaalang-alang.”

Inamin din ni Manzano na personal siyang nilapitan ni Sen. Jinggoy Estrada para imbitahan siyang sumapi sa Puwersa Ng Masang Pilipino pero hindi pa siya nagko-commit ng kahit na ano.

“Yes, wala pang finality. Hindi pa kami nakapag-reach [ng] agreement. So, imbitasyon lang. ‘Yan din naman ang ginagawa ng ibang partido. Ini-invite rin ako.”

May mga ispekulasyon din na kaya niya ginive up ang kanyang posisyon bilang OMB chairman ay dahil plano na talaga niyang tumakbo bilang senador sa 2010 elections.

Ngunit paliwanag ni Manzano: “Well, kasi sa OMB naman, as per law, hanggang dalawang termino ka lang ng tig-3 years so wala kang magagawa. Magsi-6 years na ako. Since malapit na rin mag-December, naisip ko lang na umalis ng maaga.”

Ganunpaman, confident si Manzano na maayos niyang iiwan ang kanyang trabaho sa OMB.

“Maganda naman ang naging reputasyon ng OMB here in our country, sa US, at sa iba pang bansa. Remember ang OMB nananalong Asia’s Copyright Enforcer of the Year,” pagmamalaki pa niya.