Ito ang kanilang kalbaryo sa kamay ng "Matapat" o Manila Traffic and Peacekeeping Action Team.

Binuo ni Alkalde Joselito Atienza ang Matapat upang ipatupad ang mga ordinansa laban sa mga pedicab.

Ang dahilan ng pamahalaang lungsod, matagal nang bawal sa mga pangunahing lansangan ang pedicab. Nakagugulo lang ang mga ito sa kalye na matagal nang walang kaayusan.

Nakasisiksik pa ang mga ito sa kalsadang matagal nang masikip.

Seryoso si Atienza sa pangako niyang buhayin muli ang Maynila kaya pati ang mga pedicab, ibinilang sa kanyang programang paglilinis.

Trabaho ng mga boluntaryo ng Matapat na suyurin ang Recto at Avenida Rizal at pagdadamputin ang mga pedicab na naliligaw ng landas.

Isang pedicab ang nakita ng The CORRESPONDENTS na papatawid ng Recto. Hindi ito nakawala sa mata ng Matapat. Agad hinuli ang tsuper ng pedicab.

Dahilan ng Matapat, walang lisensya at rehistro ang karaniwan sa mga pedicab kaya tungkulin nilang ilagay sa tama ang mga ito.

Sa isa namang pagkakataon, pati ang pinamili sa palengke na dapat sana ay sa kusina ng Fabella Hospital, dinala sa presinto dahil nakasakay sa pedicab.

Ang mga pedicab na nakahimpil sa gilid ng kalsada, hinuli rin.

Mahigpit at walang patawad ang Matapat. Minsan pati pasahero, napeperhuwisyo rin.

Isang pedicab ang mayroong sakay na babaeng inatake ng alta-presyon.

Pinabayaan naman ito ng Matapat dahil agaw-buhay na ang babae. Pero sabi ng mga nakakita, pinabayaan ang pedicab dahil mayroong kamerang nakamatyag.

Minsan, nauuwi sa batuhan at away ang panghuhuli ng Matapat.

Kung inaakala ng Matapat na matututo ang mga "padyak" o tsuper ng pedicab, nagkakamali sila.

Hindi pa man nakalalayo ang mga boluntaryo ng Matapat, nagkalat muli ang mga pedicab sa Recto.

Sa kabila ng paggigiit ng Matapat sa mga umiiral na ordinansa, nasa padyak ang simpatiya ng mga tao.

Tanong nila: Bakit hindi mga magnanakaw ang ipahuli ni Mayor?

Parang kailan lang, aliwan ng mga namamasyal sa Cultural Center of the Philippines ang pedicab.

Ngayon, ito ang ang pinagkukunan ng kabuhayan ng mga dating tambay sa kanto o mga nagbagong buhay na snatcher at holdaper.

Aabot sa P8,000 ang bagong sidecar para sa pedicab, P9,000 naman kung bago lahat ng piyesa, P12,000 kung mayroong kasamang stereo.

Mabibili ang segunda manong pedicab sa halagang P3,500. Kasama na dito ang pagpapasadya ng mga brake.

Pedicab at lakbay-lansangan
Para sa isang lungsod na walang matinong sistema ng transportasyon para sa nakararami, ang pedicab ang paraan ng masa upang makapaglakbay sa lansangan.

Pero ang pagkakaroon ng pedicab sa mga lansangan ay tanda ng papaurong na takbo ng pamumuhay.

Higit pa itong masahol kaysa kalesa dahil tao ang bumubuno ng trabaho ng tao.

Sa Maynila pa lang, tinataya nang mayroong 7,000 pedicab. Ito ang pantawid gutom ng maraming pamilya sa lungsod.

Sa maghapong pagpadyak, ang isang tsuper ay maaring kumita ng P200.

Kasama pa rito ang P50-P60 na boundary sa operator. Mayroon ding tinatawag na "hulog-boundary." Dito, bawat pasada ay hinuhulugan ng tsuper ang pedicab para balang araw ay mapasakanya ito.

Ayon sa mga tsuper, mayroong pera sa pamamasada ng pedicab ngunit hindi sa pagpadyak nito.

Anila, ang nagkakapera ay ang mga tauhan ng Matapat.

Sagot naman ni Rose Chua, hepe ng Matapat, sa kanilang opisina lang sa kalye Arroceros sa Quiapo nagmumula ang release order para sa mga nahuhuling pedicab.

Aniya, walang plano si Atienza na burahin ang pedicab sa mukha ng Maynila. Sa katunayan, P250 lang ang singil ng pamahalaang lungsod para sa permiso ng pamamasada.

Hangad lang ni Atienza, ani Chua, ang maging maayos at malinis ang Maynila.

Dagdag pa niya, minsan nang nagbigay ng serbisyong libreng gupit at kamiseta ang alkalde sa mga tsuper ng pedicab.

Matapat at matiyaga sa panghuhuli
Sa isang pag-ikot sa Recto at Avenida Rizal sa karaniwang araw, 60 na pedicab ang nahuhuli ng Matapat. Talaga namang nakakamangha ang tiyaga ng mga tauhan ng Matapat.

Kahit tanghaling tapat, masipag silang makipaghabulan sa makukulit at palaaway na namamasada ng pedicab.

Tatlong taon na mula nang itinatag ni Atienza ang Matapat. Dalawang ulit sila kung rumonda sa maghapon. Isa sa umaga, isa sa hapon.

Sa kabila nito, hindi nangangaunti ang dami ng mga nahuhuli.

Sa opisina ng Matapat ang bayaran ng multang P200 sa bawat huli.

Katumbas ito ng maghapong kita ng tsuper.

Pero sa impounding area pa lang ng Matapat sa Tondo Sports Complex, nagkakabayaran na umano, ayon sa mga tsuper.

Natiyempuhan ng The CORRESPONDENTS ang isang namamasada na katutubos lang ng kanyang pedicab kahit walang resibo ng Matapat.

Nais sana niyang makipag-usap sa The CORRESPONDENTS ngunit pinigil siya ng isang kaibigan.

Ayon sa kaibigan ng tsuper, dapat na silang mamasada upang bawiin ang ibinayad sa multa.

Dalawang mukha ng Maynila
Nasaksihan ng The CORRESPONDENTS ang pagkakakulong ng tatlong magkakapatid na namamasada ng pedicab sa Presinto 2 ng Western Police District.

Ayon sa pulisya, may kinalaman ang The CORRESPONDENTS sa kaso ng tatlo. Napagbintangan ang magkakapatid na mga holdaper.

Giit ng pulisya, ang magkakapatid ang mga batang-Tutuban na nakapanayam ng The CORRESPONDENTS sa isang kabanata tungkol sa Divisoria.

Tungkol ang kabanatang ito sa mga insidente ng panghoholdap sa mga negosyanteng Chino sa Tutuban at Recto.

Pero kahit anong pilit, hindi maniwala ang hepe ng himpilan na hindi ito ang mga bata na naunang nakapanayam ng The CORRESPONDENTS para sa kabanatang nabanggit.

Nag-ugat ang pagkakadakip sa tatlo nang mapanood ng Pangulong Arroyo ang kabanata tungkol sa mga batang Tutuban. Bunganito, inutusan niya ang WPD na arestuhin ang mga holdaper sa Recto.

Kabilang sa mga nadakip sina "Edmond," "Edwin" at "Eddie" (di-tunay na mga pangalan).

Katuwiran ng mga pulis, gumagamit ng droga ang magkakapatid nang madakip nila.

Sagot naman ng ina ng tatlo, natutulog silang lahat sa loob ng bahay nang damputin ng pulisya.

Kadalasan, mga namamasada ng pedicab ang nahuhuli kapag natiyempuhan ng Matapat.

Totoong sa hanay nila matatagpuan ang dating mga holdaper at snatcher tulad ni "Ric."

Dating miembro ng "donut gang" si Ric. Hindi siya holdaper ng kilalang tindahan ng donut kundi magnanakaw ng mga gulong ng kotse.

Nakakatawang isipin na ngayon pa siya nahuli kung kailan niya naisipang magpakatino.

Aminado si Ric na lahat ng bisyo ay pinasukan niya. Pero nabago ang lahat nang siya ay mag-asawa.

Ani Ric, ayaw niyang magpakain ng nagmula sa nakaw sa kanyang mga anak.

Mayroon na siyang sariling pedicab ngunit nahuli ito ng anti-littering task force ng city hall.

Aniya, mabuti sa Matapat, natutubos ang pedicab pero sa anti-littering task force, wala nang saulian.

Ganito rin ang nangyari sa pedicab ni "Nato" o higit na kilala bilang Bangkay sa kahabaan ng Recto.

Katatapos lang niyang hulugan ang pedicab nang mahuli ng anti-littering task force.

Tulad ni Ric, nagbagong buhay si Nato nang makapag-asawa. Dati siyang snatcher.

Sinamahan ng The CORRESPONDENTS si Nato sa impounding area ng anti-littering task force.

Naniniwala si Nato na maaari pa niyang mabawi ang kanyang pedicab.

Ang bakuran ng Museo ng Maynila ang tambakan ng mga pedicab na nahuhuli.

Walang makapagpaliwanag kay Nato kung ano ang nangyari sa kanyang pedicab.

Nagbanta pa ang mga tauhan ng city hall dahil bawal ang mga sibilyan sa lugar na iyon.

Totoong sa isang banda ay gumaganda ang mukha ng Maynila. Malinis na ang underpass ng Quiapo at mayroon nang makinang nagbubuga ng hamog sa Plaza Miranda at higanteng fountain sa Liwasang Bonifacio.

Ang Roxas Boulevard naman, gabi-gabi ay sinisilaban ng mga higanteng ilaw na kahugis ng globo.

Pero ito rin ang Maynila sa kuko ng mga awtoridad.

Ang hindi nakikita ng marami ay ang mga nabubulok na buhay na nakatago sa bahay na tagpi-tagpi.