The doctor is out
"The doctor is out"
Itinanghal ng The CORRESPONDENTS, Lunes, Pebrero 13, 2006

Ulat ni Abner Mercado

Dalawang buwan na lang ang hinihintay ni Dr. Amory Grijaldo at pansamantala niyang iiwan ang mag-iina sa Pilipinas para makipagsapalaran sa Estados Unidos.

Para sa kanya, pamilya ang dahilan kung bakit tatalikuran ni Grijaldo ang propesyon bilang doktor sa Pilipinas upang maging nars sa Johns Hopkins Hospital sa Baltimore, Maryland.

Ngayon pa lang, may hatid nang matinding pananabik para kay Grijaldo ang kanyang paghahanda patungong Amerika.

Pinakaimportante sa lahat ng pinaghirapan at pinaghandaan ni Grijaldo ay ang kanyang "immigrant visa" na siyang pasaporte niya sa kaginhawahang nais sungkitin sa Amerika.

Sa kabila nito ay may kahalong lungkot ang napipinto niyang pagkawalay sa kanyang asawang si Racquel at mga anak na sina Ulrich at Josh.

Bayani
Sa kanyang pag-alis, binalikan ng The CORRESPONDENTS ang bayan na pinanggalingan ni Grijaldo sa Jomalig, Quezon, na kanyang pinaglingkuran sa nakaraang dalawa at kalahating taon.

Noon pang huling linggo ng Enero 2006 nagbitiw si Grijaldo bilang doktor sa Jomalig ngunit nagbabalik siya roon habang hinihintay ang pag-alis papuntang Amerika.

Mula sa bayan ng Real, anim na oras ang biyahe ng bangka patungo sa isla ng Jomalig.

Tinatayang 7,000 katao ang populasyon sa Jomalig. Pangingisda ang pangunahing ikinabubuhay dito ng mga tao. Bagama't nakapagtatanim din ng palay, sa dagat pa rin nakabatay ang pamumuhay ng mga mamamayan.

Malayo sa kabihasnan ang Jomalig kaya biyaya ang isang manggagamot na tulad ni Grijaldo nang mapadpad siya sa roon.

Sa kanyang pagbabalik, mistulang bayani na sinalubong ng mga residente si Grijaldo.

Matapos mabatid ng buong bayan ang pagbabalik ng kanilang doktor, dumagsa ang mga nais magpagamot.

Alaala ng paglisan
Sa Unibersidad ng Santo Tomas nagtamos ng Medisina si Grijaldo noong 1998. Sa pamamagitan ng programang "Doctor to the Barrios" ng Kagawaran ng Kalusugan (DOH), dinala siya sa Jomalig upang maglingkod.

Sa kabila ng lahat ng kakulangan, sinikap punan ni Grijaldo ang paglilingkod na dinakila ng mga taga-Jomalig.

Pero sa bandang huli, ang lahat, isa na rito si Grijaldo, ay may kanya-kanyang pangarap na nais niyang mabigyan ng katuparan.

May bigat sa dibdib ang desisyon iwan ni Grijaldo ang paraisong isla ng Jomalig na itinuring na rin niyang tahanan.

Ngunit kahit nalulungkot ay sinubukan pa ring magbiro ng doktor upang maibsan ang nararamdaman.

Sa gitna ng pagbibiro ni Grijaldo sa kanyang naging mga karanasan sa Jomalig, malinaw ang hatid na lungkot ng kanyang desisyon sa mga residente.

Gayunman, inunawa siya ng mga taga-Jomalig dahil maayos niyang nailatag ang nilalaman ng kanyang puso sa pagbibitiw. Naging matapang siyang ilatag ang iba pa niyang hangarin sa buhay na kanyang binabalak para sa pamilya.

Aminado si Alkalde Rodel Espiritu ng Jomalig na marami ang nalungkot sa desisyon ni Grijaldo. Ngunit sa kanyang paglisan ay hindi na kailanman mabubura sa alaala ng mga taga-Jomalig ang bakas na iiwan ni Grijaldo bunga ng ginawa niyang paglilingkod.