Banta ng rebolusyon, krisis sa kampo
"State of emergency"
Itinanghal ng The CORRESPONDENTS, Lunes, Pebrero 27, 2006

Ulat ni Rose Eclarinal

Pasado 3 p.m. noong Pebrero 26, 2006, nagsimula ang tensyon sa Fort Bonifacio matapos ianunsyo ng Armed Forces of the Philippines (AFP) ang pagsibak kay Maj. Gen. Renato Miranda, ang komandante ng Philippine Marines.

Kapalit ni Miranda, itinalaga ng AFP sa pwesto si Brig. Gen. Nelson Allaga bilang bagong hepe ng Marines.

Sa pagdating ni Col. Ariel Querubin ng Marines sa kampo pasado 5 p.m., ibinulalas niya ang pagkadismaya sa pagkakasibak kay Miranda at humingi ng suporta sa taumbayan. Si Querubin ang hepe ng 1st Marine Brigade at kilalang malapit na tauhan ni Miranda.

"Nananawagan lang kami para suportahan ang aming commandant at 'yung organization kasi after this 'pag watak-watak kami, the Marines would no longer be relevant," aniya.

Umugong agad ang mga ulat na mayroong mga pwersa ng Marines na kumikilos para suportahan si Querubin at ang nasibak na si Miranda.

Itinanggi agad ni Allaga na mayroong pagkilos sa mga tropa ng AFP. Aniya, nananatiling tapat ang Marines sa pamunuan ng militar.

Sabi ni Allaga: "I am in control."

Kumakagat na ang dilim noong 6 p.m. nang dumating ang tinatayang tatlong batalyon ng Marines para magbigay ng suporta kay Miranda. Higit pang nadagdag ang tensyon sa kampo.

Pagpasok ng The CORRESPONDENTS sa kampo, latag na ang dilim. Pinatay din ng mga awtoridad ang serbisyo ng kuryente sa loob ng kampo at hindi na rin nagpapapasok ng sibilyan.

Samantala, sa labas ng bakuran ng kampo ay nagtipon na ang mga sibilyan, aktibista at pulitikong tumugon sa panawawagan ni Querubin.

Kabilang sa kanila ang abogandang si Liwayway Vinzons-Chato na kilalang abogado ng oposisyon at ang aktres na si Melissa Mendez.

Sabi ni Vinzons-Chato, nakatanggap lang siya ng text sa cellular phone kaya siya nagtungo sa kampo. Tumanggi siyang ihayag kung sino ang nagpadala ng text.

Sa panig ni Mendez, sinabi ng aktres na "naaawa" siya sa Marines.

Naroon din si Ronald Lumbao, ang aktibista na pinuno ng isang pangkat na kaalyado ng dating pangulong Joseph Estrada. Anang aktibista, malinaw sa pagtitipon na iyon na ayaw ng taumbayan kay Pangulong Gloria Arroyo.

Nakisabit sa isyu?
Sa loob ng kampo, ilang kasunduan ang pinag-uusapan sa pagitan ng mga opisyal ng Marines.

Sa labas ng tanggapan ng Marines, pinagbawalan nang maglabas-masok sa kampo ang mga sibilyan at iba pang tao na walang kinalaman sa pangyayari.

Sa bakuran ng kampo, nagsimula nang magkairingan ang mga awtoridad at aktibistang itataboy nila.

Isang babae ang nakita ng The CORRESPONDENTS. May suot siyang ID ng media at nakikiusap sa mga awtoridad na huwag itaboy ang mga tao na nagtipon doon.

Pero nabatid ng The CORRESPONDENTS na wala nang kinalaman sa pagiging media ang babae at kasapi na lang siya ng Partido ng Masang Pilipino ni Estrada.

Samantala, nakalusot ang ilang pari at madre sa lugar malapit sa Marine Barracks at nagsimula na silang magdasal.

Namataan din doon ang ilang personalidad mula sa panig ng oposisyon. Kabilang sa kanila si Amina Rasul na matagal na ring nananawagan sa pagpapaalis sa Pangulo.

Makailang ulit na
Ang pangyayari sa kampo ay hindi ang unang pagkakataon na nagtawag ng suporta ang militar.

Militar din ang nasa likod ng pagbagsak ni dating pangulong Ferdinand Marcos noong 1986 nang bumaliktad ang dating heneral na si Fidel Ramos. Isa si Ramos sa pinakatapat na heneral ni Marcos.

Kasabay ng pagbaliktad ni Ramos, nanawagan din ng suporta si Jaime Cardinal Sin na magtungo ang mga tao sa EDSA para sa People Power.

Noong panahong iyon, ang magiging pangulong si Corazon Aquino ay namamalagi sa Cebu. Nanawagan din siya na suportahan ng mga tao ang mga sundalong nagrebelde kay Marcos.

Tanghaling tapat ng Pebrero 24, 2006, bumuhos ang mga tao sa EDSA. Hindi na sila nakayanang itaboy ng pulisya at militar.

Sa pagtataya ni Prof. Clarita Carlos, dating pangulo ng National Defense College of the Philippines, "In the case of Marcos, all the conditions for the continuing grievances of the people [were there]."

"It only took Juan Ponce Enrile and Fidel Ramos ot take the final position but even then, by themselves alone, they won't be able to do it."

"Kung hindi sinuportahan ng civilian, humarang sa tangke ['yung mga madre], hindi matatapos 'yun," dagdag niya.

Sabi ni Carlos, nakasalalay ang tagumpay ng isang rebolusyon kapwa sa sibilyan at militar.

Magugunitang nang mag-aklas ang mga sundalo noong 2003 sa Oakwood sa Makati, hiningi ng grupo ni Lt. Senior Grade Antonio Trillanes ang suporta ng taumbayan. Hindi dumating ang hinihinging suporta ni Trillanes.

Pero sabi ni Carlos, nakikita niyang iba na ang sitwasyon ngayon.

'Yung kay Trillanes, iba ang stake doon. Ito, iba 'yung situation kasi nakababa yung [Presidential Proclamation No. 1017], may Garcillano [issue]."

Katiwalian, ugat ng lahat
Samantala, sa gitna ng tensyon noong Pebrero 26 ay nakiusap ang Malacañan na itigil na muna ang pag-eere ng mga pangyayari sa kampo ng Marines.

Habang nananawagan ang Palasyo, hindi pinalampas ng mga gwardya ng kampo si Gng. Aquino at iba pang pangkat na sususporta sa Marines.

Sa labas ng bakuran ng kampo, nagkairingan ang grupo nina Lumbao at ng mga sundalong bantay.

Dakong 10:30 p.m., pinaurong na ang mga tangke ng marines at sinabi ni Allaga na tapos na ang mahigit pitong oras na standoff sa kampo.

Ayon kay sa mga ulat, nadaan sa botohan ang aksyon ng Marines upang itayo ang kanilang bandila bilang isang sangay ng AFP na may sariling paninindigan.

Ayon sa Marines, ang tropa ay iisang samahan na walang bahid ng kulay mula sa labas ng kanilang kapatiran.

Si Querubin na nagpatawag ng suporta ng taumbayan, tahimik na humarap sa mga mamamahayag sa pagtatapos ng sigalot.

Pero kahit nagtapos ang krisis sa Marines, mahirap pa ring sabihin kung huminto na ang problema sa militar at administrasyong Arroyo.

Sabi ni Carlos, isa lang ang malinaw ngayon. Ang nangyari sa kampo ng Marines ay larawan lang ng malalim at matagal nang problema sa AFP.

"Dapat resolbahin 'yung pinanggagalingan ng grievance [which is] corruption."