Natupad na pangarap
"Dear Joe" itinanghal ng The CORRESPONDENTS
Enero 23, 2006

Ulat ni Rose Eclarinal

Kung titingnan ay mistulang mag-ama na sina Gualen Morgado at Scott Holmes dahil malayo ang agwat ng mga edad nila. Pero sabi nga, ang pag-ibig ay walang sinasanto.

Beinte-dos anyos lang si Morgado, bunso sa walong magkakapatid. Hindi na niya natapos ang kursong Computer Science dahil walang pantustos ang ama niyang magbubukid parasa kanyang pag-aaral.

Bunga nito ay namuhunan si Morgado para "Internet chat." Ito ang ginawa niya para makapag-asawa ng banyaga.

Dagdag ni Morgado, Internet chat lang din ang nakikita niyang paraan para maibsan ang kahirapan ng pamilya.

"Bale praktikal na rin kasi mahirap kami...as in mahirap talaga," aniya.

Matapos ang mahigit isang taon ng chat at pakikipagsulatan, daig pa ni Morgado ang nanalo ng milyon-milyong piso sa lotto.

Ngayon, isang malaking bahay sa Cabadbaran, Agusan del Norte, ang ipinatatayo ng kasintahang Amerikano, si Holmes.

Edad 59 si Holmes, isang retiradong abogado na pinasok ang negosyong "real estate" sa Hawaii.

Dalawang beses na siyang nakipagdiborsyo at si Morgado ang ikatlong babae na pakakasalan niya.

Sa panig ni Morgado, sinabi ng Pilipina na ang bahay na ipinagagawa ng kasintahan ang katuparan ng kanyang mga pangarap.

Bukod sa bahay, isang malaking lote sa Cabadbaran ang nakatakdang bilhin ni Holmes para sa nobya. Hindi lang iyon dahil maging ang pamilya ni Morgado ay binigyan ng kabuhayan ng Amerikano.

Kabilang dito ang mga tindahan ng karne at prutas para sa mga kapatid ni Morgado. Mayroon din silang isang trak na magagamit para sa negosyo.

"Si Scott din ang bumili ng mga ito, sa akin nakapangalan. Para sa pamilya ko, para makatulong sa pamilya ko," sabi ng babae.

Hindi lang mga kapatid ni Morgado ang nabiyayaan ni Holmes. Maging ang pinsang niyang nagpondo sa Internet chat nila ni Holmes, may biyaya rin.

Sabi ni Morgado, mahal din ni Holmes ang kanyang mga kaanak kaya maging ang barberya ng pinsan ay pinalagyan ng "air-con" at pinaayos ang mga upuan.

'Fairytale'
Mistulang kwento ni "Cinderella" ang salaysay ni Morgado kaya marami sa mga dalaga sa Cabadbaran ang naeengganyong makapag-asawa ng mga banyaga.

"Second-class" na bayan ang Cabadbaran. Pangunahing ikinabubuhay ng mga residente rito ang pagsasaka at pangingisda kaya ganoon na lang kataas ang pangarap ng mga babae sa bayan.

Batid ito ni Jun Palarca, isang opisyal sa lalawigan. Aniya, nagsimula ang lahat noong dekada '70 sa pamamagitan ng mga "pen pal." Sa pagdating ng makabagong teknolohiya tulad ng "computer" at Internet, lumawak ang mga posibilidad para sa mga residente.

"Makikita natin dito na karamihan sa mga babae sa Cabadbaran ay mahilig sa Internet chat. Siguro marami tayong makikita na mga babae na gustong makapag-asawa ng foreigner," aniya.

Halimbawa lang ang kaso ng mga babae sa Cabadbaran sa dumaraming bilang ng mga Pilipino na nahihilig sa Internet chat. Sa tinatayang 84 milyon na populasyon sa bansa, pitong milyon ang gumagamit ng Internet.

Sa buong mundo, pangatlo ang Pilipinas sa mga pinakamataas na bilang ng mga babae na gumagamit ng Internet kasunod ng Amerika at Canada.

Sa susunod na mga taon, tinataya ng mga experto na lalo pang madaragdagan ang bilang ng mga Pilipina na gumagamit ng Internet.

Patunay dito ang mga babae sa Cabadbaran na mula sa pen pal ay umusad Internet at kaakibat na teknolohiya nito.

Ayon sa pamahalaang lokal ng Cabadbaran, noong 2005 ay mahigit 20 mga babae sa bayan ang nakapag-asawa ng mga banyaga. Nagawa nila ito sa pamamagitan ng Internet chat o "Internet dating."

Biruan nga ng mga lalaki sa Cabadbaran, posibleng sila na ang maubusan ng mga babae na mapapakasalan.

Lahat may pakinabang
Bukod sa mga babae, may iba pang nakikinabang sa Internet. Sila ang mga negosyanteng may-ari ng mga "Internet shop."

Wika nga, maganda ang Internet para sa mga residente ng Cabadbaran. Sa puhunang P50 kada oras, pwede nang makapamiliu ng kakwentuhan sa pamamagitan ng chat.

Natutuwa si Manuel Meloria, isa sa mga negosyanteng may Internet shop sa bayan. Aniya, anim sa naging mga kostumer niya ang nakapag-asawa ng mga banyaga.

Sa Internet shop din ni Meloria nakilala ni Weng Lynch ang asawang si David, isang Briton.

Kwento ng "isang linggong pag-ibig" ang nangyari sa mag-asawa. Noong una ay "e-mail" lang muna ang ipinadala ni David. Kasunod nito, tinawagan niya si Weng.

"When we talked, he said 'I'm David Lynch and I'm going to marry you," sabi ni Weng.

Hindi problema kay David ang tatlong anak ni Weng mula sa unang asawa. Sabi ni David, mamahalin din niya ang mga anak ni Weng.

Nagtatrabaho sa Saudi Arabia si David noong makakwentuhan niya sa Internet si Weng. Pangako ng Briton, pagbalik niya sa England ay aayusin niya ang mga papeles para mapakasalan ang Pilipina.

Tinupad ni David ang pangako. Matapos ang isang linggo, nagtungo siya sa Pilipinas para pakasalan si Weng.

Aminado si Weng na ayaw niyang makapag-asawa ng Pilipino dahil masama ang karanasan niya sa dating kabiyak dahil ginugulpi siya ng lalaki.

Kaya matapos mapawalambisa ng kasal, naghanap agad si Weng ng kapalit sa pamamagitan ng Internet.

Kahit ang tatlong anak ni Weng sa unang asawa, aakuin ni David. Sa Pilipinas na rin balak magretiro ng Briton at dito rin sila magpapagawa ng malaking bahay.

Kung pera ang pag-uusapan, walang dapat problemahin si Weng. May sarili siyang trabaho at kahit anong uri ng pagkakakitaan, pinapasok niya.

Ang higit na importante ngayon, aniya, ay magkaroon siya ng katulong sa pagtataguyod sa mga anak.

Si Mr. Right
Natagpuan ni Morgado ang hinahanap niyang si "Mr. Right" na makapal ang bulsa at mabait.

Sa kaso ni Weng, natagpuan niya ang pangalawang sugal sa pag-ibig at kasabay nito ay ang kanyang sandalan.

Aminado ang dalawa na marami ang nagtatanong kung tunay ang nabibiling pag-ibig. Marami ring nagtataka kung ano ang kapalit ng karangyaan sa pakikisama sa isang tao na halos estranghero.

Pahiwatig ni Morgado, higit na importante na maging praktikal. Ngunit aniya, hindi humihingi ang kanyang mga kaanak kay Holmes.

Pero sabi ng Amerikano, handa siyang tumulong dahil kaya niya.

Ang pag-aasawa ng mga banyaga, partikular ang mga Amerikano, ang tinitingnan ng ilan bilang paraan upang makaahon sa kahirapan. Hindi nag-iisa ang babae rito dahil kasama sa pangarap ang kanyang buong pamilya.

Ngunit hindi naging ganito ang kwento nina Morgado at Holmes noong una. Sabi ng babae, noong una ay ayaw ng kanyang pamilya sa Amerikano dahil kuripot umano.

Hindi lang ang batikos na ito ang tinanggap nina Morgado at ni Weng. Pero anang dalawa, wala itong problema sa kanila.

Sabi ng dalawa, wala silang tinatapakan. Ang alam nila, natupad ang kanilang pangarap at masaya ang kanilang pamilya.