Himalayan diaries: The road to Everest
"Himalayan Diaries (The Road to Everest)"
Itinanghal ng The CORRESPONDENTS, Marso 27, 2006

Ulat ni Abner Mercado

KATHMANDU, Nepal - Mula sa itaas ng himpapawid masisilayan ang Himalaya na mistulang ipininta ng kalikasan dahil sa angking kagandahan.

Ito ang Annapurna Range na nasa kanlurang bahagi ng Kathmandu, kapitolyo ng bansang Nepal.

Sa wika ng mga Nepali, ang Himalaya ay mula sa magkahiwalay na salitang "hima" at "alaya." Himal na ang ibig sabihin ay bundok at alaya, tahanan ng yelo o kabundukang nababalutan ng yelo.

Mula sa kwintas ng kabundukang ito, ang "Machupuchare" o higit na tanyag sa tawag na fish tail para sa mga mountaineer, ang itinuturing ng nakararami na nakarating na rito bilang pinakamarikit na bundok sa buong daigdig.

Dito sa bahaging ito ng Nepal hindi nalalayo ang isa pang tanyag na kabundukang pinapangarap na maakyat ng sinumang mountaineer sa mundo.

Sintayog ng mahigit 29,000 talampakan ng Mount Everest ang pangarap ng Pinoy. Dito isisilang at isusulat ang pagwagayway sa kauna-unahang pagkakataon ang bandila ng Pilipinas.

Buwan ng Pebrero 2006 nang tahimik na tumulak ang lima sa miembro ng The First Philippine Mt. Everest Team sa Kathmandu.

Mula Maynila lumipad ang grupo sakay ng eroplano ng tatlong oras patungong Bangkok sa Thailand.

Mula sa Thailand panibagong tatlong oras na naman ang muling ililipad patungo sa Kathmandu sa Nepal, ang bansang nakapagitan sa dalawang higanteng mga bansa: ang India sa timog at China sa hilaga.

Dalawa sa mga miembro ng grupo sina Pastour Emata, 22 anyos na tubong-Mindanao at anak ng Mt. Apo, ang pinakamataas namang bundok sa Pilipinas; at si Leo Oracion, 22, mula Quezon pero Cebu. Sina Emata at Oracion ang itinuturing na mga lider ng The First Philippine Mt. Everest Team Expedition na magtatayo ng karangalan at bandila ng Pilipinas.

Sa kanilang pagtatangka, mahalagang naaarmasan sila ng mga kagamitan laban sa malupit na kapaligiran at pabago-bagong panahon sa Himalaya.

Mula sa mapagkumbabang pinagmulan, kapwa ihahatid nina Emata at Oracion ang pangalan ng Pilipinas para mapabilang sa komunidad ng mga naitala sa kasaysayan ng Everest na pinamuhunanan ng lakas at pagsasanay at ng matinding pananalangin.

Kwento mula sa bubungan ng mundo

Sa kwento ng sinumang mountaineer, may kalakasan at kahinaan lalo na kung masusupil ang laman ng kanilang kalooban.

Sampung taon na sa trekking at mountain expedition business sa Katmandu ang mag-asawang Henry "Harka" Pariyar at ang maybahay niyang si Emma na isang Pilipina.

Ang kanilang international adventures treks at expeditions ang isa sa mga nangunguna sa negosyong ito sa Kathmandu na nakabase sa lungsod ng Thamel.

Unang nakilala ng The CORRESPONDENTS ang mag-asawa noong 2004.

Sa paglalakbay nina Emata at Oracion ngayong 2006 sa Everest, batid ng The CORRESPONDENTS na pagmamalasakitan ng mag-asawa ang adhikain ng pangkat.

Noong Marso 2, 2006, dumating ang The CORRESPONDENTS at ang grupo ng mga mountaineer para makipagpulong. Pangunahin sa grupo si Regie Pablo, ang expedition coordinator at kasalukuyang pangulo ng Mountaineering Federation of the Philippines.

Lahat ng dapat ihanda ay pinag-usapan. Si Emma din ang tumulong kina Emata at Oracion na umikot sa Thamel para hanapin ang mga tamang tindahan para sa kanilang mountaineering equipment.

Kahit mahigit isang dekada nang naninirahan sa Nepal si Emma at mayroon nang pamilya sa bansang ito, nasa Pilipinas pa rin ang kanyang puso at sa grupong magbabandila ng bansang kanyang pinagmulan.

Sa kasaysayan ng Everest, sina Edmund Hillary ng New Zealand at Tenzing Norgay, ang sherpa ng Nepal, ang unang naitala sa kasaysayan ng mundo na nakatapak sa tuktok ng bundok noong 1953.

Marami ang sumunod kina Hillary at Norgay pero mayroon ding nagbuwis ng buhay sa Everest. Kabilang sa kanila sina Mallory at Irvine, mga Briton na nauna kina Hillary noong 1924.

Ayon sa kasaysayan, kahit ang pinakabihasang mountaineer ay walang binatbat sa poot ng panahon sa Everest.

Noong Marso 2, 2006, lumabas ng Kathmandu ang grupo para higit na maging kaaya-aya ang paligid para sa pagsasanay nina Emata at Oracion.

Nagtungo ang grupo sa Nagarakot, mahigit isang oras ang biyahe sa labas ng Kathmandu.

Nagmagandang loob ang Nepali na si Bal Dhouju, may-ari ng Hotel Country Villa, na kupkupin ang grupo sa Nagarakot. Sa kabila ng pagiging Nepali, malapit ang Pilipinas sa puso ni Dhoju.

Anim na taon sa Pilipinas si Dhouju. Apat na taon dito ay ginugol niya sa Baguio habang nag-aaral. Aniya, malaki ang pagkakatulad ng Nagarakot at Baguio.

Aniya, matamis ang kanyang pangarap para kina Emata at Oracion. "I want to wish them all the best," ani Dhouju.

Sa ikalawang araw sa Nagarakot inakyat-baba ng grupo ang mga bundok nakapaligid dito. Bahagi ito ng acclimatization para sa higit na hamon na hihingin ng Everest.

Sa puntong ito, mahaba na ang panahong pinagsamahan at pinaghandaan ng grupo para sa pangarap na akyatin ang Everest. Mapalad ang The CORRESPONDENTS na kasama ito na mailahad ang kwento patungo sa bubungan ng mundo.