Baguhan pa lang sa pagiging "jockey" o hinete ng kabayo si John Alvin Guce pero halos dalawang taon na rin ang binubuno niya sa Philippine Jockey's Academy (PJA).

Sumasabak na rin siya sa mga karera noon pang Oktubre 2004 pero isang taon pa bago mabigyan ng lisensya bilang hinete..

Tatlong araw ang inilalagi ni Guce sa klase upang rebyuhin ang mga estilo ng pagsakay sa kabayo.

Si George Stribling, ang guro ni Guce sa paaralan, ay tatlong dekadang nagsasanay sa mga kabayong pangkarera sa Amerika.

Pero sa pagsasanay ng mga kabayo, lumipat si Stribling sa paglatigo sa mga estudyante ng paghihinete. Aniya, kailangang disiplinahin ang mga estudyante na matitigas ang ulo.

Nag-iisa ang PJA sa bansa sa pagbubukas ng oportunidad sa mga tulad ni Guce na matupad ang pangarap na maging propesyunal na jockey.

Mula nang sumakay siya ng kabayo noong Oktubre, nakapag-uwi na si Guce ng P300,000 halaga ng mga panalo sa karera.

Bukod sa pag-aaral sa PJA, tinutulungan din si Guce ng ama niyang si John upang higit na mapaghusay ang laro. Gayundin, maging ang mga tiyuhin ni Guce na sikat nang mga hinete ay nagtuturo sa kanya.

Sa PJA, todo-ensayo pa rin si Guce.

Samantala, tampulan ng tukso ang kaklase niyang si Kenneth Bergancia. Palpak umano ang estilo niya at masyado siyang mataas sa pagsakay sa kabayo.

Bunga nito, itinatama ni Stribling ang estilo ng pagsakay ni Bergancia.

Unang sabak
Tulad ni Guce, lumalaban na rin sa karera si Bergancia. Pero kumpara kay Guce, unang karera pa lang ni Bergancia ang nasaksihan ng The CORRESPONDENTS.
Noong umaga bago ang kanyang unang laban sa karera, isinama ni Bergancia ang The CORRESPONDENTS sa kanilang bahay sa gilid ng riles malapit sa karerahan sa Santa Ana.

Anim na magkakapatid sina Bergancia. Nawalan ng trabaho ang kanyang ina nang mahagip ng trak sa daan. Tumagal nang dalawang taon ang pagkakaratay ng ina ni Bergancia bago muling nakalakad.

Samantala, ang ama ni Bergancia ay nagdidilehensya sa pamamagitan ng pagkukumpuni ng sirang mga relo.

Sa kabila ng kahirapan sa buhay, ipinagmamalaki ng pamilya si Bergancia. Bagama't hindi pa siya propesyunal na hinete, naipaayos na ni Bergancia ang dingding ng kanilang bahay.

Para sa mga kapitbahay sa gilid ng riles, inspirasyon si Bergancia. Sikat na sikat siya sa lugar at maraming mga karerista ang umaasa ng "tip" sa kanilang pagtaya sa karera.

Dapithapon ng isang hinete
Noong araw na sumabak sa unang karera si Bergancia, panglima siya sa pwesto. Pero ang problema, hanggang ikaapat na pwesto lang ang pinagkalooban ng premyo at pangatlo rito si Guce.

Pero pinutakti ng premyo ang isang hinete. Siya ang hinete na nagwagi ng unang pwesto. Halos lahat ng panalo ay nakopo ni Pati Dilema.

Ayon kay Dilema, hindi na nakapagtataka dahil siya ang numero unong hinete sa ngayon. Anang hinete, pitong taon na niyang hawak ang titulong ito.

Siya rin ang inspirasyon nina Guce at Bergancia.

Mula sa kanyang mga panalo, nakapagpagawa na si Dilema ng isang bahay malapit sa karerahan sa Sta. Ana. Bukod pa dito ang tatlong bahay sa Cavite at mga kagamitan na naipundar niya para sa pamilya.

Sabi ni Dilema, sa kanyang pagtanda ay nais niyang makita ang kanyang pinaghirapan.

Sa kasalukuyan, kumikita si Dilema ng tinatayang P300,000 kada buwan.

Ngunit aniya, disiplina ang sikreto sa lahat at tuwing umaga, wala siyang palya sa ensayo.

Tulad ng anumang sugal, walang tiyak na panalo at talo sa karera. Kahit ang numero unong hinete, inaabot din ng malas.

Nakalimutan na umano ng dati nilang mga tagahanga ang retiradong mga hinete tulad ni Efren Bernabe na kapitbahay ni Guce sa Barangay Pista sa Sta. Ana.

Kung dati ay nagmumula sa kanya ang mga tip sa karera, ngayon ay kumukuha na lang si Bernabe kay Guce ng impormasyon sa kabayo na tatayaan.

Nagsimula ang kalbaryo ni Bernabe noong mahulog siya sa kabayo 12 taon na ang nakakaaraan. Limang taon nakaratay sa kama si Bernabe bago siya nakalakad muli.

Sa loob ng panahon na baldado si Bernabe, tanging mga kapatid ng kanyang asawa ang tumutulong sa kanila dahil walang naipon ang pamilya mula sa mga panalo niya.

Pero tuwing hapon pagpatak ng 6 p.m. at simula ng karera, napapawi ang lungkot ni Bernabe. Pero ngayon, sa harap ng telebisyon, sinusubaybayan na lang niya ang landas na minsang tinahak.

Samantala, sa loob ng karerahan, patuloy sa pamamayagpag ang mga tulad nina Guce at Bergancia sa pagsisimula ng kanilang paglalakbay sa mundo ng karera.