Ulat ni Patrick Paez

MARIVELES, Bataan - Sa karagatang sakop ng lalawigan ng Cavite inabutan ng pagsabog at kasunod na pagkalat ng apoy ang barkong pampasaherong SuperFerry 14 (SF14) noong Pebrero.

Pero dito dinala malapit sa baybayin ng Mariveles sa Bataan dahil ayon sa mga awtoridad, higit na marami ang mapipinsala kapag tumapon ang langis na karga ng barko.

Mahigit 100 katao ang namatay sa insidente at hanggang sa kasalukuyan, mayroon pang mga pasaherong nawawala.

Ngayon, nakasalalay sa operasyon ng Tanod Baybayin (Coast Guard) ang paghahanap sa mga nawawalang pasahero.

<b>Hindi umabot sa CDO</b><br>
Patungong Cagayan de Oro at dadaan ng Bacolod ang SF 14 dakong 11.30 p.m. noong Pebrero 27, 2004, nang tumunog ang alarma nito para sa sunog.

Batay sa mga ulat, hindi pa gaanong nakalalabas ng Look ng Maynila ang barko nang magkasunog dito.

Maayos na nailikas ng mga tripulante at iba pang tauhan ng barko ang higit sa 900 mga pasahero. Pero marami ang naipit at naiwan sa nasusunog na barko.

Batay sa mga ulat, SF 14 umano ang pinakamaayos na barko sa Pilipinas kaya higit na nakapagtataka ang sinapit nitong trahedya.

Nagsimula umano ang apoy sa A-Deck ng barko. Sa kasalukuyan, dito nakatuon ang siyasat ng mga imbestigador.

Hindi na umabot sa ibabang bahagi ng barko ang apoy pero wala halos natira sa Tourist Section na siyang kinatagpuan ng karamihan sa mga pasaherong nasawi.

Sa katunayan, habang kinukunan ng The CORRESPONDENTS ang loob ng barko, mayroon pang mga bangkay na nakita rito.

7 bangkay pa nakuha
Kasama ng Coast Guard, bumalik ang The CORRESPONDENTSsa barko. Sa puntong iyon, pitong bangkay ang nakuha sa loob ng SF14: tatlong babae, dalawang lalaki at isang binatilyo.

Nakuha ang mga bangkay sa A-Deck, sa bahagi ng barko na hindi nakalubog sa tubig-dagat.

Ayon sa Coast Guard, hindi napansin ng mga tauhan nila ang mga bangkay. Pero nang malinis ang kalat, sumingaw ang amoy ng nabubulok na bangkay.

Naniniwala si Commodore Wilfredo Tamayo ng Coast Guard na tumakbo sa banyo ang pitong pasahero upang magkubli sa apoy na mabilis kumalat matapos sumabog ang isang bahagi ng barko.

Aniya, batay sa paunang pagsusuri ay buo pa ang mga katawan at hindi napinsala ng apoy.

Samantala, bukod sa Coast Guard ay hindi rin madali ang trabaho ng mga operatiba ng Pambansang Kawanihan ng Pagsisiyasat (NBI).

Limampu't pitong nawawalang mga pasahero ang kailangan nilang kilalanin at bigyan ng pangalan mula sa pira-pirasong mga bahagi ng bangkay na nasa morge ng NBI ngayon.

Liban sa 57, mayroon nang mga bangkay na nakilala at ipinaubaya sa mga kaanak.

Dalawang anggulo
Sa pagtatapos ng buwan ng Hulyo, natapos din ang pagtatapal sa mga butas ng <i>SF 14</i>. Muling pinalutang ng mga experto ang barko at hinatak papuntang dry dock sa Mariveles.

Ayon sa mga awtoridad, bihirang mangyari na ang isang barkong sangkot sa sakuna ay maisalba nang buong-buo.

Maging ang mga kargamento, bagahe at sasakyang nasa loob ng barko ay buo pero malamang, anila, ang mga kotse ay sira na ang makina matapos ang limang buwan na pagkakalubog sa tubig.

Sinagot ng kompanyang WG&A ang operasyon sa imbestigasyon at paghila ng barko patungong Mariveles. Sa kabila nito, tumangging maghayag ang kompanya hinggil sa hinihinala nitong dahilan sa aksidente.

Isang bagay ang lumilitaw sa lahat ng testimonya ng mga pasaherong nakaligtas: may sumabog sa SF 14.

Dalawa ang lugar na tinitingnan ng mga imbestigador na maaaring pinagmulan ng pagsabog.

Sa ulat ng Special Marine Board of Inquiry (SBMI), nabatid na posibleng sumingaw umano ang tangke ng LPG dahil sa kalumaan ng barko. Napag-alaman na 23 taon na ang <i>SF 14</i> at nabili nang segunda mano mula sa Japan.

Nabatid din sa siyasat na ang linya ng LPG ng barko ay nakalatag sa ilalim ng A-Deck na siyang pinagmulan umano ng pagsabog.

Batay sa siyasat, ang simpleng pagbubukas ng ilaw o pagsindi ng lighter sa sigarilyo o paggamit ng cellular phone ay maaaring pagsimulan ng pagsabog.

Sa anggulong ito, aksidente ang nangyari sa SF 14.

Ang ikalawang anggulo ay sabotahe.

Sa pagdinig ng SBMI, inihayag ng mga testigo na nakaamoy sila ng pulbura at ang pagyanig ay sinabayan ng pagkalat ng liwanag, mga palatandaan ng isang bomba.

Ang ipinagtataka lang ng mga imbestigador ay bakit hindi nagiba ang mga dingding ng barko sa Tourist Section kung totoong binomba ang barko?

Nilinaw sa ulat ng SBMI na walang matibay na ebidensyang susuporta sa anggulong pambobomba sa SF 14.

Abu Sayyaf daw?
Noong Abril, anim na hinihinalang mga bandidong Abu Sayyaf ang ipinarada ng pamahalaan. Isa umano sa mga suspek ang nagtanim ng bomba sa SF 14.

Hinuli ng mga awtoridad si Redendor Dellosa alias Habil, isang balik-Islam, dahil nagmayabang umano ang suspek sa mga kainuman na may kinalaman siya sa pagkasunog ng barko.

Ang hindi alam ni Dellosa, isa sa mga kainuman niya ay impormante ng Pambansang Pulisya.

Inamin ng Abu Sayyaf ang pambobomba. Isang pasahero na nagngangalang Arnulfo Alvarado ang kinilala ng Abu Sayyaf na operatiba nito at nagkarga ng bomba sa barko sa pamamagitan ng isang telebisyon.

Pero hindi tinanggap ng SBMI ang pag-amin ng Abu Sayyaf dahil lumilitaw na pinahirapan umano si Dellosa para magsalita ng kanyang nalalaman sa insidente.

Ayon kay Fatemah Balbin, abogada ni Dellosa, noon pang Marso hinuli ang kliyente niya pero hanggang sa kasalukuyan ay walang utos ng aresto at wala ring kaso sa korte.

Sa pagkakaalam ng abogada ni Dellosa, mga lata ng pintura ang sumabog sa barko at pinag-iinitan lang ang mga balik-Islam tulad ng kanyang kliyente.

Sa kabila ng paggigiit ng suspek na inosente siya, may ilang detalye na nagtuturo sa teoryang sabotahe. Ayon sa imbestigador na nakausap ng The CORRESPONDENTS, may bakas ng "pushing effect" sa kisame ng barko.

Ang pushing effect, aniya, ay posibleng epekto ng pagsabog ng bomba. Anang imbestigador, kaiba ito sa epekto ng pagsabog ng tangke ng LPG.

Samantala, naniniwala ang mga awtoridad na maaaring susi rin sa imbestigasyon si Arnulfo Alvarado. Kumpirmadong pasahero ng barko si Alvarado at nakalista bilang Passenger 51 sa Tourist Section ng barko.

Sabi ng Abu Sayyaf, si Alvarado ay kilala rin bilang Abu Muadz na tulad ni Dellosa ay isa ring balik-Islam at siyang nagtanim ng bomba sa SF 14.

***

Sa panayam ng SBMI sa mga tauhan at tripulante ng barko, nabatid na sumaklolo sila ilang mga pasaherong naipit sa Tourist Section pero hindi nila mabuksan ang mga pintuan ng mga silid.

Bunga nito, napilitan ang mga tripulante na iwanan na lang ang mga pasahero.

Bunga nito, pinanagot ng SBMI si Capt. Ceferino Manzo dahil nahuli ang opisyal sa utos na buksan ang kagamitan sa pamatay-sunog ng barko at alarma.

Pinasasampahan din ng SBMI ng kasong administratibo ang chief engineer, chief electrician at maging ang hotel manager ng barko.

Sa kabila nito, walang sinasabi ang SBMI kung pananagutin din ang may-ari ng barko.

Sinubok umano ng SF 14 ang kakayahan ng pamahalaan, ani Ricardo Blancaflor, opisyal ng Kagawaran ng Tanggulang Bansa at isa sa mga miembro ng lupon na nag-imbestiga sa insidente.

Pero aniya, base sa resulta ng imbestigasyon ay hindi napahiya ang pamahalaan.

Ngunit hindi pa rin tapos ang imbestigasyon. Ang siste, kung hindi simpleng aksidente ang nangyari sa SF 14 ay mukhang hinahamon muli ng masasamang loob ang kakayahan ng pamahalaan na labanan ang mga terorista at ang banta ng terorismo.