Ulat nina Karen Davila at Abner Mercado

Ikalawang bahagi

THE HAGUE, Netherlands - Katabi lang halos ng embahada ng Pilipinas sa The Hague ang opisina ng Stichting Bagabag Philippines Foundation, ang grupo na itinatag at pinamamahalaan ng isang dating nars na Pilipinas sa London, si Cita Schols.

Limampu't dalawang taong gulang at dalawang dekada nang naninirahan sa Netherlands si Schols kasama ang asawang si Wim Schols.

Aniya, noong 1991 nila naisipan ng kanyang asawa na magpaaral ng mga bata mula sa paaralang pinanggalingan niya sa Bagabag, Nueva Vizcaya.

Unang ipinagawa nina Schols ang kumbento o bahay ng pari na namamahala sa Saint Jerome's Academy.

Kasunod nito, ipinatayo ang gusaling ng administrasyon at silid-aklatan gayundin ang silid ng mga guro. Mula noon, nagtuloy-tuloy ang pagiging mabuting samaritano ni Schols.

Sa kasalukuyan, mahigit 70 mga estudyante ang pinapaaral niya.

Ayon kay Teresita Gurat, punong guro ng paaralan, magkaklase sila ni Schols noong mga bata pa sila.

Ang hindi niya alam, paglipas ng mga taon ay mismong ang kaklase niya ang magkakaloob ng biyaya sa kanyang kapwa.

Habang nasa The Hague ang grupo ng The CORRESPONDENTS, inimbitahan ni Schols ang pangkat na lumibot sa lungsod at makipagkwentuhan sa kanya.

Unang tanong ng The CORRESPONDENTS kay Schols: Paano siya nakibagay sa kanyang asawang Dutch? Aniya, madali lang pakibagayan ang mga Dutch dahil mababait sila at mabubuti ang mga ugali.

Tahimik ang pamumuhay sa The Hague kumpara sa Amsterdam na kabisera ng bansa.

Sa kabila nito, masigla ang kalakalan sa lungsod. Sa kasalukuyan, ang Netherlands, tulad ng maraming bansa sa Europa, ay gumagamit ng iisang pera. Ito ay ang Euro.

Tinangka ng mga bansa sa Timog-Silangang Asya, tulad ng Pilipinas, na gawing iisa ang kanilang pera pero hindi ito umubra.

Ang problema, hindi ganoon katatag ang ekonomiya ng mga bansa sa bahaging ito ng daigdig kumpara sa Europa.

Sa isang tindahan ng mga prutas at gulay, sinubukan ng The CORRESPONDENTS na bumili ng saging.

Sa katumbas na halaga sa piso, ang isang piraso ng saging ay nagkakahalaga ng P60.

Kung ikukumpara sa Pilipinas, mahal ang saging dito pero kung tutuusin, mura para sa mga Dutch.

Naging panauhin din ang The CORRESPONDENTS sa tahanan ni Nelly de la Rosa, isang Pilipinang mang-aawit na sikat sa Europa.

Isang Ilokana si de la Rosa at nagmula siya sa bayan ng Lucia sa Ilocos Sur.

Kasama ang asawang si Ronald Van Der Weijden, inimbitahan ni de la Rosa ang The CORRESPONDENTS para maghapunan sa kanilang bahay.

Sa pag-aasikaso ng bisita, Pinoy na Pinoy si Van Der Weijden, isang malinaw na impluwensya sa kanya ng kabiyak.

Sa okasyong iyon, kitang-kita ng The CORRESPONDENTS kung gaano kamahal ng kanyang asawang Dutch si de la Rosa.

Bagama't mahigit 10 taon na silang nagsasama, naroon pa rin ang pagmamahal nila sa isa't isa.

Mapalad si de la Rosa sa kanyang napangasawa.

Aniya, mistulang kwento ni "Cinderella" ang istorya ng kanyang buhay.

Aminado si de la Rosa na isa siya sa mga Pilipina na nangibang bansa at nakapag-asawa ng dayuhan.

Swerte siya sa aspetong ito dahil maligaya siya kumpara sa iba na nabigo sa kanilang mga pangarap.

Ngunit kahit lumigaya siya sa piling ng asawa at tagumpay sa trabaho, sinabi ni de la Rosa na mayroon pa ring pilit sumisira sa kanyang pinaghirapan.

Aniya, tulad sa Pilipinas ay laganap din ang pagkakaroon ng "utak-talangka" ng ibang Pilipino sa Netherlands na sinisiraan siya sa trabaho.

Sa kabila nito, nanindigan si de la Rosa na kahit harangan siya ng sibat, kung tunay at dalisay ang kakayahan ay dadaloy ang angkin niyang karunungan.