Hindi pa halos nakakagulapay ang bansa sa hagupit na sinapit sa mga bagyong Violeta at Winnie noong huling linggo ng Nobyembre at unang bahagi ng Disyembre nang magbanta ang bagyong Yoyong.

Sa lalawigan ng Aurora inabutan ng pag-aabang ang The CORRESPONDENTS sa pagdating ng bagyo noong Disyembre 2. Isa ang Aurora sa mga probinsya na tinahak ng bagyo.

Sa hangganan ng Pampanga at bayan ng Cabiao, Nueva Ecija, nasalubong ng The CORRESPONDENTS ang mga sasakyang bantulot na tumawid sa rumaragasang tubig-baha.

Ang ibang mga sasakyan ay tumirik na rito bunga ng pag-apaw ng ilog mula sa nagdaang mga bagyo.

Sa Talavera-Pantabangan Road, binalaan ng mga mamamayan ang The CORRESPONDENTS na hindi makapapasok ang grupo sa Baler, Aurora, kung dadaan ng lungsod ng Palayan sa Nueva Ecija. Babala ng mga residente, marami pang mga guho at kalsadang hindi madaraanan patungong Baler.

Matapos marating ng grupo ang kapitolyo ng lalawigan, sa Baler, nagtungo ang The CORRESPONDENTS sa tabing dagat na nakaharap sa Pasipiko. Balisa at nagngangalit ang mga alon, isang pagbabadya na mayroong malakas na paparating na unos.

Ito ang unang pagkakataon na nakarating ang The CORRESPONDENTS sa bahaging ito ng Pilipinas. Sa puntong iyon, natiyak ng pangkat na galit na galit ang daluyong ng karagatan.

Sa mga oras na iyon, ganap nang 4 p.m. at ilang oras mula noon ay ang inaasahang paghampas ng bagyong Yoyong sa lalawigan.

Kasabay ng pagsakmal ng kadiliman, bumuhos ang malakas na ulan sa lalawigan.

Noong mga oras na iyon, malimit ituon ng grupo ang lente ng camera sa bintana ng tinutuluyang gusali uupang makunan ang nag-aalimpuyong bugso ng hangin at ulan.

Sa Barangay Sabang sa Baler, sinamahan ng The CORRESPONDENTS ang mga awtoridad upang sagipin ang mga residenteng naninirahan dahil sa panganib ng dalampasigan.

Dinala ang mga residente sa kapitolyo. Larawan sila ng basang mga sisiw na tumatakas sa hagupit ni Yoyong.

Biktima ng nagdaang gabi
Kinaumagahan, bumalik ang grupo sa Sabang. Mula sa larawan ng nagdaang gabi, nag-iba ang Sabang.

Halos matakpan ang kalsada at mga bahay dito ng inanod na mga sanga at kahoy.

Isa sa napinsalang mga bahay ay ang tahanan ni Rodolfo Tubera. Mahigit tatlong dekada nang naninirahan sa Sabang si Tubera pero ngayon lang niya naranasan ang ganitong magkakasunod na bagyo na halos lumumpo sa kanila.

Sa kanyang puso, sinabi ni Tubera na ang salarin sa trahedyang ito ay ang mga tao na lumalapastangan sa kalikasan.

Ngunit para sa mag-asawang August at Aida Miemban, mapalad pa rin ang mga mamamayan ng Baler dahil mabilis ang pagdaan ni Yoyong sa magdamag.

Pero inamin din ng mag-asawa na gumaganti lang ang kalikasan sa pagmamalabis ng tao. Inaani lang umano ng tao kung ano ang kanyang ipinunla.

Samantala, sa karatig na Barangay Buhangin ay lumapad bigla ang ilog. Bunga nito, napinsala ang mga bahay na nakatirik sa pampanga nito.

Maging ang tulay sa ilog ay nanganganib na magiba dahil sa pagragasa ng baha.

Tulad sa awiting "Kastilyong Buhangin," mistulang nagbiro ang kalikasan sa pagiging marupok ng pampang ng barangay na ito sa daluyong ng baha.

Ayon kay Isabelita Capin, isa sa mga residente ng barangay, naiwasan sana ang ganitong trahedya kung hindi naghangad nang labis ang mga magtotroso sa pamumutol nila ng punongkahoy sa kagubatan.

Sa barangay ding ito natagpuan ng The CORRESPONDENTS si Amelia Guinicaran. Mahabang panahong pinangarap ni Guinicaran na makapagpundar ng sariling bahay.

Natupad ang pangarap ng ginang ngunit mabilis itong naglaho na parang bula dahil sa trahedya.

Matapos ang unos, mistulang mga piraso ng kanyang pangarap na pilit binubuo ni Guinicaran ang kanyang bahay.

Mapalad pa rin kahit papaano
Pero kung tutuusin ay mapalad pa rin ang mga mamamayan ng Baler. Sa karatig bayan ng Dingalan, habang isinusulat ang kwentong ito ay mayroon pa ring mga barangay doon na hindi nararating ng tulong.

Walang kalsadang nag-uugnay mula sa labas ng bayan patungong Dingalan kaya kinailangang gumamit ng "helicopter" ang The CORRESPONDENTS upang marating ang mga lugar na ito at pagkalooban ng tulong ang mga biktima ng kalamidad.

Mula sa tuktok ng gusali ng ABS-CBN sa Lungsod Quezon, nilipad ng helicopter ang bayan ng Dingalan.

Kasama ang The CORRESPONDENTS, dumaan ang helicopter sa ibabaw ng Sierra Madre sa biyahe na tinatayang isang oras.

Mula sa helicopter, kitang-kita ng grupo ang nakahambalang na mga troso sa ibaba. Hinala ng The CORRESPONDENTS, ang iba sa mga trosong ito ay pinutol din ng mga residente habang ang iba pa ay sadyang nabunot dahil sa hagupit ng bagyo.

Sa Paaralang Elementarya ng Dingalan bumaba ang helicopter. Dito natagpuan ng grupo si Alkalde Jaime Ilarde.

Matapos makapamahagi ng tulong at kapanayamin si Ilarde, sumakay muli ng helicopter ang The CORRESPONDENTS.

Sa muling paglipad ng helicopter, tinangka ng grupo na magtungo sa lugar na tanging hindi pa napupuntahan, ang Barangay Dikapanikian.

Walang daan nag-uugnay sa naturang barangay mula sa kabayanan dahil binura ng gumuhong lupa ang kalsada.

Kung sasadyain ito sa pamamagitan ng bangka sa pamamagitan ng dagat, tiyak na tataob ang sasakyan dahil sa malalakas na alon.

Mahigit 100 pamilya ang naninirahan sa Dikapanikian at itinaboy lahat patungo sa paaralang binisita ng The CORRESPONDENTS.

Pangamba ng mga residente, maaaring maubos ang mga gamot at pagkain na ipinagkaloob sa kanila. Tanong nila, hanggang kailan tatagal ang tulong na ito?