Sinalakay ng pulisya ang isang KTV bar sa kalye Evangelista, Maynila noong Linggo dahil sa malalaswang palabas nito sa entablado.

Nanguna ang Intelligence and Investigation Division ng Western Police District sa pagsalakay sa Boss J Club.

Dalawampu't dalawang mananayaw at guest relation officers (GROs) ang naaresto. Kabilang sa mga ito ang isang dating sexy star na nahuli sa aktong nagsasayaw ng walang saplot sa katawan. Kinilala itong si Pia Paula.

Dinakip rin sa lugar si Desiree Agustin, siyang tagapamahala ng KTV bar.

Sa tanggapan ng WPD-IID, tinangkang aregluhin ni Agustin ang mga pulis ngunit nabigo siya. Nagwala naman si Paula at nangagat pa ng braso ng isang pulis.