Sinalakay ng mga kagawad ng Western Police District ang isang sinehan sa Quiapo, Maynila, kaugnay ng sumbong na ginagawa itong pronta ng prostitusyon.

Ayon sa ulat, legal kung titingnan ang panlabas na bahagi ng Peace Theater sa Quezon Boulevard. Ngunit sa loob nito naglipana ang mga miembro ng ikatlong kasarian at lalaki na nagbebenta ng panandaliang-aliw.

Isang lalaking homosekswal ang nahuli sa akto habang nakaluhod sa kanyang kostumer. Agad namang itinaas ng lalaki ang kanyang salawal nang mailawan ng mga pulis.

Pilit din na itinanggi ng lalaki na pugad ng prostitusyon ang sinehan. Ayon sa lalaki, nanggaling lang siya sa palikuran kaya niya itinaas ang kanyang zipper.

Pahayag naman ni Conrado Tenorio ng Business Development Office sa pamahalaang panlungsod, mayroong kaukulang permiso ang sinehan na magpalabas ng pelikula.

Ngunit sa pagkakataong ito, aniya, dapat na ipasara ang Peace Theater dahil sa paglabag sa patakaran ng lungsod laban sa ilegal na gawain.