Ayon kay Chief Supt. Edgardo Aglipay, deputy director for operations ng PNP, partikular na inilagay sa pinakamataas na alerto ang Lungsod Cotabato sa Maguindanao. Si Aglipay rin ang hepe ng Task Force Mindanao ng PNP.

Nilinaw naman ng opisyal na tanging Mindanao lang ang nakapailalim sa pinakamataas na alerto. Pinawi niya ang pangamba ng mga residente ng Kalakhang Maynila na posibleng kumalat dito ang karahasan sa Mindanao.

Ani Aglipay, nakahanda ang pwersa ng National Capital Region Police Office sa anumang banta ng kaguluhan ng mga rebelde sa Kamaynilaan.

Hinggil sa pagtataas ng alerto, inihayag ni Aglipay na nakatanggap ng impormasyon ang PNP na Cotabato ang susunod na lulusubin ng mga rebelde.

"Mayroon kaming nasagap na impormasyon na nakatakdang sumugod ang MILF sa Cotabato," anang opisyal.

Sa tulong ng Sandatahang Lakas at mga residente, magtatayo ng mga checkpoint ang pulisya sa mga daanan papasok ng Cotabato, dagdag ni Aglipay. Ito ay upang mapigilan ang mga grupo na magtatangkang maghasik ng gulo sa lungsod.

Niyanig ng sunod-sunod na pagsabog ang tatlong lalawigan sa Gitnang Mindanao noong nakaraang linggo matapos masakop ng militar ang Barangay Buliok sa Pikit, Cotabato.

Kasunod nito, ginulantang naman ng mga insidente ng pambobomba ang mga tore ng National Power Corp. sa mga lalawigan ng Maguindanao at Cotabato. Noong Huwebes, isang bomba ang pinasabog sa paliparan ng Cotabato at pamilihan sa Koronadal South Cotabato.

Isa katao ang nasawi sa pagsabog sa paliparan ng Awang samantalang limang tao ang sugatan sa pambobomba sa Koronadal.

Umamin ang bandidong Abu Sayyaf na kagagawan nila ang pagsabog sa paliparan ngunit naniniwala rin ang mga awtoridad na MILF ang nasa likod nito.