Bukod sa pagiging kawal-PAF, nabatid na namamasada rin ng taxi si Jonathan Pajarillo kapag nasa labas ng serbisyo.

Dinakip ng pulisya si Pajarillo matapos tutukan ng baril ang kapwa tsuper na si Roberto Merilles sa Aurora Boulevard sa lungsod.

Kapwa namamasada sa Aurora Blvd. ang dalawa nang tawagin ng isang grupo ng mga babae si Merilles. Nakita ni Pajarillo ang pangyayaring ito. Kasunod nito, ibinangga ng suspek ang kanyang sasakyan sa taxi ng biktima.

Hindi pa nakuntento si Pajarillo dahil tinutukan siya nito ng baril, ani Merilles.

Anang biktima, inakala ni Pajarillo na inagawan niya ng pasahero ang suspek ngunit ang totoo, siya ang unang tinawag ng mga babae.

Isang nagmalasakit na motorista ang nakakita sa pangyayari at itinawag sa Patrol 117 ng Pambansang Pulisya. Agad namang rumesponde ang mga pulis sa lugar at dinakip si Pajarillo.

Sa presinto ay napag-alaman na walang permit-to-carry ang baril ng suspek na rekisito sa armas na dadalhin ng mga sundalong nasa labas ng serbisyo-militar.