Ani Villar, tagapangulo ng committee on foreign relations sa Senado, lubhang mapanganib para sa mga Amerikano ang tumuntong sa bahaging ito ng bansa.

Sinabi ng mambabatas na tensyonado ang sitwasyon sa lugar dulot ng napipintong digmaan ng U.S. at Iraq sa Gitnang Silangan. Inihayag ng senador na bilang mananampalataya ng Islam, itinuturing na kapatid ng mga Moro sa Mindanao ang mga Arabo sa Gitnang Silangan.

Ang pagdating ng mga Amerikano para sa Balikatan ay maaaring isipin ng mga Moro na kaugnay sa digmaang ilulunsad ng U.S. laban sa Iraq. Higit pa dito, ang anumang kilos ng dayuhang pwersa ay pwedeng isipin ng mga Moro bilang kumakalaban sa relihiyong Islam.

Iginiit ni Villar na hindi siya naniniwala sa pahayag ng Malacañang na magiging madali ang pag-atras ng mga Amerikano sakaling maipit sa pagbuwelta ng mga rebeldeng Moro.

Para sa mambabatas, malabo ang ganitong larawan tulad ng ipinipinta ng mga tagasulong ng Balikatan.

Inilunsad noong Linggo ang unang yugto ng Balikatan sa punong himpilan ng Southern Command sa Lungsod Zamboanga. Dumating ang unang grupo ng mga sundalong Amerikano na magsasanay at maglilipat ng kaalamang militar sa mga kawal-Pilipino.

Inaasahang tatagal ng anim na buwan ang ensayo na nakatakdang lumipat sa lalawigan ng Sulu.

Kaugnay nito, binanggit ni Villar na magiging problema ng bansa kung saan kukunin ang pondo sakaling makihalo sa anumang digmaang ilulunsad ng U.S. Anang senador, halos tuyo na ang kabang-yaman ng bayan sa pondo.

Si Villar din ang tagapangulo ng committee on finance ng Senado.

Samantala, nais ng senador na linawin ng pamahalaan ang terms of reference ng Balikatan 03-1. Aniya, matagal nang hinihingi ng Senado ang TOR upang mapag-aralan kung mayroong pahintulot ang mga Amerikano na makilahok sa opensiba laban sa mga rebelde.

Ngunit hanggang ngayon ay naghihintay pa rin ang mga senador sa pagadating ng dokumentong ito, pagtatapos ni Villar.