Tumagal ng tatlong oras ang insidente ng pambibihag ni Marlon Vorella sa biktimang si "Mike" (di-tunay na pangalan) ng Barangay Siniguelasan sa Bacoor.

Ayon sa ulat, dinukot ni Vorella ang biktima at ikinulong sa inuupahang kwarto. Nagbanta pa ang suspek na sasaksakin ng tinidor ang tiyan ng paslit.

Napakiusapan naman ang suspek na pawalan si Mike makalipas ang tatlong oras. Unang hinanap ni Vorella ang isang kinatawan ng sangguniang lalawigan bagamat napasuko ito ng mga pulis-Bacoor at opisyal ng barangay.

Sa presinto, ipinagtapat ni Vorella na nagawa niyang bihagin ang bata dahil sa pangungulila sa pamilyang nasa Leyte.

Anang suspek, apat na taon na silang hindi nagkikita ng mga anak. Nabatid na hiwalay din sa asawa ang suspek.

Sa kabila ng apela ni Vorella, itutuloy pa rin ng mga magulang ng biktima ang pagsasampa ng kasong illegal detention laban sa suspek.