Japan sinalanta ng lindol, tsunami; 29 patay


Isang napakalakas na lindol ang yumanig sa hilagang bahagi ng Japan pasado alas-2 kaninang hapon. Naitala ang sentro ng magnitude 8.9 na lindol mahigit 300 kilometro mula sa kapitolyo ng Tokyo.

Ramdam ang malakas ng pagyanig sa mismong business center ng Tokyo. Nagpulasan ang mga tao palabas ng mga gusali.

Ang mga nag-o-opisina naman, nagtago na lang sa ilalim ng mga lamesa.

Nagyakap-yakap naman ang mga nasa daanan habang umiiyak at nagsisigawan ang iba.

Nagkabitak-bitak din ang mga gusali at mga daanan. Isang gusali ang nakitang nagliyab sa Odaiba, Tokyo.

Sinarado ang mga paliparan at inihinto ang biyahe ng mga tren. Makalipas lang ang halos 30 minuto, naramdaman naman ang magnitude 7.4 na aftershock.

Apat na milyong bahay ngayon sa Tokyo ang walang kuryente.

Ilang sandali pa, nanalasa na ang gahiganteng tsunami sa ilang bahagi ng Japan. May taas na 7 metro ang alon na rumagasa sa lungsod ng Kesennuma at Sendai sa Miyagi Prefecture.

Sa laki ng tubig na dala ng tsunami, tinangay ang mga sasakyan sa mga daanan.

Dinala din ng gahiganteng alon ang mga bangka at barko mula sa mga baybayin.

Hindi rin nakaligtas ang mga bahay sa malawak na sakahan sa hilagang bahagi ng Tokyo. Humampas ang napakalaking tubig na may dalang mga troso. Nagliyab ang chiba oil refinery.

Ang mga na-trap sa loob ng kanilang mga bahay humihingi ng saklolo.

Sinalanta rin ang airport ng Miyagi Prefecture na halos runway na lang ang nakikita. Ang mga empleyado at ng mga pasahero ng airport nag-akyatan sa tuktok ng pinakamataas na gusali doon.

Noong miyerkules lang niyanig din ng 7.2 magnitude na lindol ang isla ng Honshu sa Japan. Tumagal ang pagyanig ng 3 minuto at naramdaman din hanggang Tokyo.

Noong 1933, 3,000 tao ang namatay matapos yanigin ng 8.1 magnitude na lindol ang hilagan-silangang bahagi ng Japan. Dindo Amparo, Patrol ng Pilipino