Arroyo, puwede nang gamutin sa labas ng ospital

Hindi natapos ang talakayan sa korte kanina sa mosyon ng Comelec na ilipat na sa regular na kulungan si dating Pangulong Gloria Arroyo.

Pero sa pagdinig, inamin ng doktor ni Ginang Arroyo sa Veterans Memorial Medical Center na puwede rin siyang gamutin sa labas ng ospital.

“I asked him na kung she can be treated as an outpatient, sabi niya, ‘I think so,’” sabi ni Atty. Charlie Yap, abugado ng Comelec.

Nilinaw naman ng doktor na nagpapagaling pa ang dating pangulo.

“Kasi may complaints pa siya, may problema pa siya eh ‘di ginagamot pa siya,” sabi ni Dr. Antontio Sison, orthopedic surgeon sa VMMC.

Osteoarthritis sa batok at likod ang dinadaing ni Arroyo, bukod pa sa ilang mas magaan na karamdaman.

Giit ng depensa, hindi pa puwedeng lumabas ng ospital ang dating pangulo.

“’Yung mga sinubmit nilang mga documents ay ang ibig sabihin no’n ay hindi pa pwede, marami pa siyang pagdadaanang therapy,” sabi ni Atty. Benjamin Santos, abugado ni Arroyo.

Rumesbak naman ang mga tagasuporta ni Ginang Arroyo sa Pasay RTC, para tutulan ang posibleng paglipat sa kanya.

“Pakawalan niyo na ang ating mahal na Pangulo kasi ito’y naghahati sa ating bansa,” sabi ni Ramon de Leon ng Kongreso ng Maralitang Tagalunsod.

Dininig din kanina ang hiling ng depensa na payagan si Arroyo na dumalo sa lamay ni Congressman Iggy Arroyo.

Pero dahil wala pang detalye ang burol, hindi pa makapaglabas ng resolusyon ang korte ukol dito.

Hiniling din ng dating pangulo na makadalo siya sa libing ni Congressman Iggy.

Pero ngayon pa lamang, tumutol na dito ang PNP dahil sa inaasahang problema sa seguridad ni Ginang Arroyo. Atom Araullo, Patrol ng Pilipino
 

Share your views