Corona nagpasaklolo sa SC para itigil ang impeachment trial

Si Chief Justice Renato Corona na mismo ang nagsabi noon na tiwala siyang magiging patas ang gaganaping impeachment trial laban sa kanya.

Pero kanina, naghain ang punong mahistrado sa Korte Suprema ng petisyon na ideklarang walang bisa ang impeachment complaint at ipatigil ang impeachment trial.

Humiling siya ng agarang TRO.

Ang naging mitsa -- ang utos ng Senado na buksan ang umano’y bank accounts niya sa BPI at PSBank na hayagang paglabag aniya sa confidentiality ng bank accounts ng sinumang mamamayan.

Giit ni Atty. Tranquil Salvador, "Kung bakit po namin dinulog, kasi wala pong pupuntahan eh. Ang tao po, kumbaga ay isipin niyo na lang ho na kami ay isang pusa o isang daga na nasa corner ka, wala ka na hong tatakbuhan eh."

Agad umaray ang prosekusyon at hinamon si Corona na buksan ang bank accounts kung walang tinatago.

Giit nila, hindi rin siya dapat humingi ng saklolo sa kanyang sariling teritoryo.

Sabi ni Rep. Erin Tañada, "Maliwanag po sa amin na sila’y natatakot na kung ano ang puwedeng mailabas ngayong araw.”

Pero giit ng kampo ni Corona, karapatan ng sinumang mamamayan na dumulog sa korte kapag inaapakan ang kanyang mga karapatan.

Binansagan ni Corona na isang “fishing expedition” ang nagaganap sa Senado.

Hindi lang daw siya, kundi ang kanyang buong pamilya ang nasisira sa mata ng publiko.

Naghain na rin ng motion si Corona na mag-inhibit sa petisyon niya ang mahigpit na karibal na si Associate Justice Antonio Carpio at isa sa mga appointee ni Pangulong Aquino na si Associate Justice Maria Lourdes Sereno dahil hindi raw maaasahang magiging patas sa kanya ang mga ito.

Bagama’t isang impeachment trial na may aspeto ring pulitikal, giit ni Corona dapat nananaig pa rin sa paglilitis ang proteksyon ng batas at mga tamang proseso alinsunod dito.

At bilang punong mahistrado ng Kataastaasang Hukuman at pinuno ng ikatlong sangay ng gobyerno, obligasyon niyang ipaglaban ang mga ito. Ina Reformina, Patrol ng Pilipino

Share your views