PSBank records ni Corona, pinabuksan ng Senado

Ayon kay Presiding Officer Juan Ponce Enrile, walang makakapigil sa Senado dahil ito lang ang may kapangyarihang magdesisyon sa mga kaso ng impeachment.

Bago ito, nagpasya ang impeachment court na huwag aksyunan ang motion for reconsideration ni Senador Miriam Santiago sa desisyong ipatawag ang mga opisyal ng bangko.

Ibinasura naman ang hiling ng depensa na ipagpaliban ang subpoena sa mga bank records habang wala pang desisyon ang Korte Suprema sa petisyon nila.

Ang presidente ng Philippine Savings Bank na si Pascual Garcia III ang unang humarap na testigo kanina.

Dala niya ang records ng limang peso accounts ni Chief Justice Corona sa bangko mula 2007 hanggang 2010.

Kaugnay pa rin ito ng Article 2 ng impeachment complaint o ang pagsisinungaling diumano ni Chief Justice Corona sa Statement of Assets, Liabilities and Net worth o SALN niya.

Base sa testimonya ni Garcia, noong 2007 ay may isang account si Corona na may ending balance na P5,018,255.56.

Sa isa namang account, May P7,148,238 na ending balance as of December 2010.

Ang isa pang account ay may yearend balance na P8.5 million noong 2009 at P12,580,316 noong sumunod na taon.

Walang record para sa dalawa pang account dahil nagsara na ang mga account pagkatapos ng taon.

Hindi naman dinala ni Garcia ang records ng dollar accounts ni Corona dahil may inihain daw silang petisyon para sa temporary restraining order sa Korte Suprema.

“Why did you not bring the records of the accounts mentioned?” tanong ni Enrile.

Sinagot naman ito ni Garcia ng: “Because we had assessed and determined that the disclosure of these accounts would expose us to criminal liability and we therefore then sought guidance from the Supreme Court for a petition that we made this morning to provide us with that guidance, Your Honor.”

“May we move that this witness be required to explain in writing not later than 12 noon tomorrow why he should not be declared in contempt of this court,” pahayag ni Senador Franklin Drilon.

“In a situation like this, we should grant the witness some consideration. Consideration that he is saying he is confronted with a dilemma. If that is so, are we so crude as to now say, 'You follow us regardless of what the consequences are for you,'” sabi ni Senador Joker Arroyo.

Matapos ang mga debate, nagdesisyon ang mga senador na pagsumitihin si Garcia ng written explanation kung bakit hindi niya dinala ang kopya ng records ng dollar accounts ni Corona sa kabila ng subpoena.

Base sa mga sagot ni Garcia, magdedesisyon ang mga senador kung iko-contempt si Garcia.

Sa unang bahagi ng hearing, iginiit ni Senador TG Guingona na hindi dapat panghimasukan o pigilin ng Korte Suprema ang mga kilos ng impeachment court.

Share your views