Away-Palasyo dahilan ng palpak na negosasyon?

Umani ng batikos ang media dahil sa coverage ng hostage crisis sa Quirino Grandstand.

Nitong Martes, mismong si Secretary Ricky Carandang ang umamin sa radio dzMM, nakalimutan ng gobyernong mag-assign ng opisyal na titiyak na hindi magiging sagabal ang media sa police operations.

“Yes. May mga pagkukulang talaga kami sa pag-manage sa media,” ani Carandang.

Inamin din ni Carandang na hanggang ngayon hindi niya alam kung sino ang dapat mangasiwa sa media sa tuwing may krisis.

“Kailangan namin makipag-usap.. Nakita naman natin noong nakaraaan na medyo hindi malinaw kung sino ang pointman padating sa pagharap sa media noong nakaraang crisis.. Kailangan linawin natin sa loob,” paliwanag ni Carandang.

Sinisisi ngayon ng ilang sources sa administrasyon ang mga paksyon sa Gabinete kaya pumalpak ang pagsagip sa mga hostages. Hindi raw nag-uusap nang maayos ang ilang opisyal dahil sa iringan ng mga paksyong Samar at Balay.

Samar ang tawag sa grupo ng mga malalapit sa pamilya Aquino; Balay naman ang mga kakampi ng Liberal Party at Hyatt 10.

Si Carandang ay bata umano ng mga taga-Balay habang ang isa pang media communications secretary na si Sonny Coloma ay manok umano ng taga-Samar.

Ganito rin ang nangyari sa kaso ng Department of the Interior and Local Government (DILG).

Kinumpirma ng sources na huli na nang pumasok sa eksena si DILG Secretary Jesse Robredo.

Si Robredo sana ang may awtoridad na humingi ng tulong mula sa iba't ibang ahensya, pero hindi raw nakakilos si Robredo dahil sa dating kasunduan na si Undersecretary Rico Puno ang mamamahala sa lahat ng police operations.

Si Robredo ay sinasabing manok ng mga taga-Balay at si Puno naman, manok umano ng mga taga-Samar.

Ayon kay dating DILG secretary Cesar Sarino, hindi malinaw kung sino ang "in charge" habang nagaganap ang krisis.

“There was no face I could associate the crisis with. I hear of the name of police Inspector Yebra, but he's not senior enough, I think, to be able to give the crisis a face. I don’t think the President was well advised. Siguro they talked about it, but they never gave him a blueprint of options and alternatives,” ani Sarino.

Ayon pa kay Sarino, sa laki ng krisis ay dapat pumasok na ang isang taga-Gabinete at mismong hepe ng Philippine National Police.

Sabi pa ni Sarino, dapat na ginabayan ng Pangulo ang mga tao kahit hindi siya ang personal na nagmamando sa operasyon.

Hindi naman umano maiiwasan ang pagkakaroon ng paksyon sa alinmang Gabinete. Ang Pangulo na raw dapat ang bahala na ipakita ang kaniyang liderato para hindi maipit ang gobyerno sa bangayan ng mga paksyon. – RG Cruz, Patrol ng Pilipino

Share your views