20 bala ipinutok mula sa labas ng tourist bus

Bago pa hilahin ang Hong Thai Bus sa Camp Bagong Diwa sa Taguig, nauna nang ineksamin ng Crime Laboratory ng Philippine National Police (PNP) ang mga tama ng bala sa bus bilang bahagi ng crime scene investigation. Dito sinuyod ng scene of the crime operatives ang mga butas na dinaanan ng mga balang naiputok mula sa loob at labas ng bus.

Ilang imahe ang eksklusibong nakuha ng ABS-CBN sa isinagawang eksaminasyon.

Sa harap ng bus, kita ang basag na signal at head lights. Sa itaas na bahagi ng windshield ng bus, makikita ang isang butas na palatandaan na papasok ang bala.

Sa kanang bumper ng bus, makikita na 3 bala ang pumasok dito. Sa kanang bahagi naman ng windshield, minarkahan ang 6 na butas ng bala palabas ng bus.

Sa bintana ng drayber, 2 bala ang pumasok. Dalawang bala rin ang pumasok sa isang bintana ng mga pasahero. Pito naman ang tama ng bala ng gulong ng bus.

Sa gawing estribo naman, isang bala ang pumasok sa isang bintana malapit dito. Anim ang balang tumama sa gilid ng estribo sa loob ng bus.

Sa pinto ng estribo, isang bala ang ipinutok mula sa loob. Dalawa naman ang pumasok na bala sa bintana ng isa pang pasahero. 

Sa loob ng bus, makikita naman ang mga tama ng balang tumalbog sa kisame at malapit sa upuan ng isang pasahero. Sa isang upuan, kita ang 4 na balang ipinutok dito. Sa dulong upuan na katabi ng comfort room, isang bala rin ang tumama sa headrest nito. Dalawang bala naman ang pumasok sa pinto ng CR.

Una nang kinumpirma ng PNP na 58 basyo ng bala ang narekober sa loob ng bus, Lahat galing umano sa M16 assault rifle ni dating Senior Superintendent Rolando Mendoza.

"Limampu't walo na mga empty shells na galing po sa M16, iyon po lahat ay gailng sa M16 na armalite rifle na gamit-gamit ni Rolando Mendoza. Lahat po iyon ay pinaputok papunta sa mga biktima at papunta doon sa assault team," ani Senior Superintendent Agrimero Cruz, tagapagsalita ng PNP.

Pero hanggang ngayon, wala pang binabanggit ang mga awtoridad hinggil sa kung ilan ang sinasabing "friendly fire" mula sa mga miyembro ng Special Weapons and Tactics ng Manila Police District.

Kung pagbabasehan ang bilang ng mga bullet holes na namarkahan ng mga awtoridad, humigit kumulang sa 20 ang naiputok ng mga pulis mula sa labas ng bus.

Patuloy pa ang bullet trajectory examination para malaman kung kanino galing ang mga putok na ikinasawi ng 8 hostages. – Maan Macapagal, Patrol ng Pilipino.

Share your views