PNoy direktang sinagot mga tanong sa hostage crisis

Napikon nang husto si Pangulong Noynoy Aquino sa naging kalakaran ng hostage crisis noong August 23. Ito ang tahasang inamin ng Pangulo sa kanyang pagharap sa amin sa isang "live" interview mula sa Malacañang nitong Huwebes. Laking hinayang din niya na hindi siya naging aktibo para tiyakin ang pagdating ng Special Action Force na dapat rumesponde sa Quirino Grandstand.

Imbes na humarap sa Incident Investigation and Review Committee (IIRC), pinili  ni Pangulong Aquino na magpa-interview sa Malacañang sa mga broadcasters mula sa tatlong pribadong TV station tungkol sa August 23 hostage crisis.

"On time" ang Pangulo at live itong ini-ere ng mga television station.

Inamin ng Pangulo na napikon siya dahil hindi nangyari ang dapat nangyari.

“Ito po ang pagbaril sa gulong ng bus, iyong napakatagal na pagpasok ng SWAT, iyong hindi alam kung anong gagawin ng SWAT. Doon po talaga napuno na tayo na iyong assurance na ibinigay sa atin ay hindi po natupad at tumungo na po tayo at hinanap na natin ang mga officials concerned,” ani Aquino.

Buong akala rin daw niya ay ang mas may kakayahan na Special Action Force (SAF) ang reresponde, gaya ng itiniyak sa kanya.

"Ang pinakamali ko nga ho dito, talagang inulit-ulit ko in several instances, ang capable unit that was tasked was supposed to have been SAF. Inulit sa akin na nandoon na kasi nahuli ko nga hong wala pa pala doon. Noong nandoon na, tinanong ko kung nag-practice na ba? Nag-practice na raw. Doon po ang ugat ng kapikunan.. Pinangako nila, ginarantiya nila, hindi nangyari,” anang Pangulo.

Ayon sa pangulo, kung maibabalik lamang daw ang pangyayari, mas nakialam siya sa estratehiya ng pulisya.

“I should have taken a more active role in the sense that iyong belief ko na General Santiago would oversee General Magtibay properly and completely, did not happen,” dagdag ni Aquino.

Pinaninidigan ng Pangulo ang desisyon niyang hindi magpakita sa command center o direktang makipag-negosasyon sa hostage taker na si dating senior inspector Rolando Mendoza.

“Nandoon po ako sa command center, sabihin natin, kada magdedesisyon sila, titingin sa akin: Gawin ninyo ‘to, gawin ninyo ‘yan. Pag kinailangan ako sa ibang lugar noong araw na ‘yon, tapos nasanay na sa sila buong araw titingin sa akin muna bago magdesisyon, kapag nagwala na si Mendoza, sino mag-go-go sa assault, tatawagan muna nila ako,” anang Pangulo.

Dagdag pa niya: “So it was a conscious choice. Iyong I can stay there, have my picture taken by everybody, show to the public I’m so concerned about this but at the same time, I will impede the abilities and efficiencies that the people who are trained to handle these things can do.”

Gayunman, iginiit daw ng Pangulo sa pulis na gawing final option lamang ang pagsugod para patumbahin ang hostage-taker dahil baka raw mas malagay sa panganib ang mga bihag.
 
Nag-sorry na raw ang Pangulo sa China dahil sa nangyari.

Pinili rin niyang huwag nang sagutin ang isa umanong nakakainsultong sulat mula sa isang opisyal ng Hog Kong.

“We were being told in very minute detail of what we were supposed to do, addressed to me,” ani Aquino.

Sa lahat ng nangyari, wala raw agad na pinasisibak ang Pangulo habang hindi pa tapos ang trabaho ng IIRC.
 
Ideya raw mismo ng Pangulo na magpa-interview para masagot na raw ang mga tanong ng bayan pero pakakaabangan pa rin kung pagkatapos ba nito ay may magbabago na sa kakayahan hindi lang ng mga pulis kundi ng mismong Pangulo na tumugon sa isang katulad o mas grabe pang krisis. – Willard Cheng, Patrol ng Pilipino

Share your views