EXCL: Customs clerk, de-Porsche, inireklamo ng pamamaril, suspindido

Ito ang CCTV video sa SLEX. Tinutugis ng Porsche na minamaneho ng Customs clerk na si Paulino Elevado ang Innova na minamaneho naman ng isang 20 anyos na estudyante.

Nag-ugat ang car chase matapos masagi ng Innova ang naturang sports car kung saan kasama ni Elevado ang isang Florencio Bato.

Nakarating sa Marriott Hotel ang habulan at doon ay pinagbabaril ng naka-Porsche ang Innova.

Pinatunayan ito ng guwardya ng hotel.

Nabangga pa umano ng Porsche ang barrier sa tarangkahan ng hotel.

Sa salaysay ng isa pang guwardya, bumaba umano ang dalawang armadong lalake na sakay ng sports car at pinaputukan ang Innova.

Inilagay na sa floating status si Elevado at isasailalim din siya sa imbestigasyon ng Bureau of Customs.

Ang lalong ikinagalit ni Commissioner Ruffy Biazon, kakilala pa niya ang ama ng biktima na mula rin sa pamilya ng mga pulitiko.

Aniya, “Doble-dobleng galit kasi una ‘yung trabahong ginagawa namin dito na i-restore ang image ng Customs eh sinira niya. As an employee, abuse of authority, clearly.”

Isasalang sa lifestyle check si Elevado dahil sa Porsche na minamaneho nito.

“Questionable na kung bakit meron siyang minamaneho na isang mamahaling sasakyan. Ni-research na namin ‘yung pagkatao niya at doon na namin na-find out na meron palang previous na kasong nakasampa sa kanya, one of which is extortion,” dagdag ni Biazon.

Ayon kay Biazon, imposibleng makabili ng ganitong sasakyan si Elevado kung pagbabatayan ang suweldo nitong P9,000 kada buwan.

Aabot sa halos P9 milyon ang presyo ng brand new na Porsche. Pero ang minaneho ng Customs employee ay 2006 model na nasa P5 milyon.

Hindi nakapangalan kay Elevado ang Porsche ngunit natunton ng ABS-CBN News ang kinaroroonan ng sasakyan.

Wala na itong plaka ngunit kita pa rin na wasak ang unahang bahagi nito.

Kung paanong napasakanya ang sasakyang ito ay nanatiling misteryo dahil 'di na nagpakita sa Customs si Elevado. Anthony Taberna, Patrol ng Pilipino

Share your views