Customs clerk na naka-Porsche, hindi na mahanap

Inamin ng Customs na hindi na nila ma-kontak ang clerk nilang si Paulino Elevado.

Si Elevado ang itinuturong nambugbog at namaril sa dalawang estudyante noong Enero 21 dahil sa away-trapiko.
 
Hinabol ni Elevado gamit ang sports car na Porsche ang mga biktima na sakay naman ng isang Innova.
 
Personal na tinawagan ni Commissioner Ruffy Biazon si Elevado, pero hindi na ito sumasagot sa telepono mula nang mag-absent nitong Lunes.

“Sa Tuesday kung wala pa siya talaga, we will initiate proceedings declaring him absent without leave,” sabi ni Biazon.

"Ngayon ang balak ko papuntahan na sa bahay," sabi naman ni Atty. Rogel Gatchalian, district collector ng Port of Manila.

Ayon sa mga kasamahan sa Customs, itinanggi pa noong una ni Elevado ang insidente, pero umamin din.

"Parang ang gusto palabasin ay may baril din itong mga bata,” sabi ni Gatchalian.

Nasa P10,000 ang sahod ni Elevado bilang clerk at taga-kolekta ng mga clearance sa mga sasakyan.

Sa kanyang 2004 statement of assets, liabilities and net worth o SALN, nakabili siya ng isang Volvo na 1995 model.
 
Sa SALN naman niya noong isang taon, umabot sa P1.1 million ang kanyang yaman.

Idineklara din niya ang negosyong buy-and-sell ng sasakyan.

“Malinis ang SALN niya. Ibig sabihin, konti ang entry kaya mas kaduda-duda. Pumapasok siya na hindi naman dala ‘yung Porsche, so hindi nahahalata ng iba,” sabi ni Biazon.

Dahil hindi nangyari ang krimen sa oras ng trabaho, panay administratibong kaso lang ang puwedeng ikaso ng ahensya kay Elevado.

Ayon sa Customs, kung hindi bumalik sa trabaho si Elevado sa loob ng 30 araw, posible na siyang ma-dismiss. Niko Baua, Patrol ng Pilipino

Share your views