Bilang ng mga namatay sa lindol, patuloy na tumataas

Ayon sa National Disaster Risk Reduction and Management Council (NDRRMC), 15 ang kumpirmadong patay sa Negros Oriental.

Pero sa tala ng Philippine Army, umabot na sa 48 ang patay.

At tayo mismo sa ABS-CBN, sa pamamagitan ng pakikipag-ugnayan sa mga local officials, ay nakapagtala na ng 56 mula sa lungsod ng Guihulngan at sa bayan ng La Libertad.

Paliwanag ng NDRRMC, hirap silang makakalap ng impormasyon.

Walang kuryente at sira-sira ang mga daan at tulay.

Ito ang mga dahilan kung bakit hirap pa rin ang NDRRMC na maabot ang mga lugar na matinding napinsala ng lindol.

Pinangangambahan ngayon na madadagdagan pa ang naitalang 15 patay.

"Blackout kasi sa lugar. So the retrieval teams were on hold, hindi sila nagpatuloy noong gabi. ‘Yung 29 base doon sa report ng Armed Forces of the Philippines, ‘yun ang kino-confirm nilang natabunan sa landslide,” sabi ni Edgardo Olet, NDRMMC chief of operations.

Dismayado naman ang organisasyon ng mga munisipalidad sa bansa sa kakulangan ng mga hazard maps na magtuturo sa kanila ng mga delikadong lugar.

Wala kasi sa active fault map ng Phivolcs ang faultline na pinagmulan ng lindol kahapon.

“May frustrations, may disappointments. Kailangan na namin ito, bakit hindi namin alam?” sabi ni Lilian de Leon, executive director ng League of Municipalities of the Philippines.

Inamin ng Phivolcs na posibleng marami pang minor faults ang hindi pa natutuklasan.

Pag-aaralan nila ang fault line sa Negros Oriental para makapagbigay ng rekomendasyon kung ligtas ba itong tirahan o hindi.

"Ang kailangan natin ngayon ay ma-locate siya accurately. Gaano ba kahaba ito at ano ang potential niya to generate earthquakes?” sabi ni deputy director Bart Bautista ng Phivolcs.

Problema naman ng Phivolcs ang kakulangan ng mga geologists.

Sa ngayon, lilima lang ang geologists ng Phivolcs na aktibong gumagawa ng active fault mapping.

Isa si Ted Sandoval sa mga dating geologist ng Phivolcs na nagdesisyong mag-resign.

“Ang titignan mo kasi doon ‘yung career growth eh, long-term bale ang titignan mo. Compared to the private sector, much more overseas, definitely baka times five ang salary,” sabi ni Sandoval.

Kung sa Phivolcs kasi, nasa P20,000 lang ang sweldo. Sa pribadong kumpanya, P50,000.

Samantala, sa report ng Department of Public Works and Highways, umabot na sa mahigit P265 million ang halaga ng pinsala.

Halos 11 na tulay kasi ang nasira, karamihan sa Negros Oriental.

Nasa 1,026 ang aftershocks ang naitala ngayong araw.

Share your views