Bangkay ng hostage taker dumating sa Batangas

Bumuhos ang emosyon ng mga kamag-anak ni dating Senior Inspector Rolando Mendoza sa pagdating ng kanyang mga labi sa kanilang bahay sa Tanauan, Batangas.

Sa tindi ng emosyon meron pang hinimatay.

Alas-3 ng hapon umalis sa Maynila ang funeral car na lulan ang mga labi ni Mendoza.

Sa bahay ng pamilya sa bayan ng Tanauan, tahimik ang mga Mendoza.

Nagkulong sila sa kanilang bahay at hindi muna nagpapasok ng media.

Bago sumapit ang alas-5 ng hapon, dumating sa Tanauan ang mga labi ni Mendoza.

Bago idaan sa bahay, idineretso muna ang bangkay sa punerarya para ayusin.

Halos alas-6 ng gabi na nang ihatid sa kanilang bahay ang mga labi ni Mendoza.

Doon na bumuhos ang emosyon ng mga kamag-anak.

Ang tahimik na amang si Mang Leonardo, bumigay sa tindi ng pighati!

Napaiyak din ang asawa at anak na pulis na si Bismarc na umuwi pa galing Bangued, Abra.

Tanggap ng mga kamag-anak ang sinapit ng biktima pero hindi nila matanggap ang paghuli ng mga pulis sa kapatid niyang si Senior Police Officer 2 Gregorio Mendoza na nagbitbit ng baril sa kasagsagan ng hostage drama.

Sa ngayon tanging matatamis na alaala na lamang ang hawak ng pamilya Mendoza sa napatay na dating pulis.

Sa ngayon nais muna ng pamilya ang “privacy” sa burol ni Mendoza. Magbibigay na lamang ulit sila ng pahayag sa media kapag kalmado na sila.

Pauwi na rin Martes ng gabi ang panganay na anak ng dating pulis para makapiling ang ama sa mga huling sandali. – Ernie Manio, Patrol ng Pilipino

Share your views