Kung ating sinusubaybayan ang mga pangyayari dito sa atin lalo na ang mga developments sa parating na halalan sa pang-panguluhan sa susunod na taon para bagang lumalabas sa isipan ng marami na ang ating magandang kinabukasan ay nakasalalay lamang sa sino man ang mahahalal na susunod na pangulo ng ating bansa. Ang ganitong kaisipan ay nakakabahala sapagkat para sa akin ang kinabukasan natin at ng bansang Pilipinas ay hindi nakasalalay lamang sa kamay ng isang tao maging ito man ay ang bagong halal pangulo. Ang ating kinabukasan bilang isang bansa ay nakadepende sa lahat sa atin at hindi lamang sa isang tao, maging sino man ang mahalal na bagong pangulo ng Pilipinas.

Ang isang kadahilanan ng ating mabagal na pag-usad ay itong kaisipan ng ilan sa atin na tanging ang pamahalaan lamang ang siyang responsible sa pagkamit ng ating magandang kinabukasan. Dahil dito ina-asa na lamang ng ilan sa atin sa pamahalaan ang lahat to the point na pati na ang pang araw-araw na pangangailangan ng pamilya ay dapat suportahan o  obligasyon pa ng pamahalaan.  Ito yong tinatawag na “dole-out mentality” ng ilan sa ating mga kababayan na umaasa na lamang sa mga pinamimigay ng mga ahensya ng pamahalaan pati na ng mga charitable institutions at mga may kayang kapitbahay.

Ang kinabukasan ng ating bansa at lalo na ng ating mga pamilya ay nakasalalay sa bawa’t isa sa atin o sa ating lahat. Tayo ay may kanya-kanyang papel na ginagampanan at dapat na gampanan ng maayos upang ang ating bansa ay umasenso at makamit natin ang paghanga hindi lamang ng ating mga kapwa Asyano kundi pati na rin ng buong mundo. At una rito ay ang ating papel bilang mga ama o ina ng tahanan. Sa larangang ito malaki ang aking paghanga sa mga OFWs. Hindi na nila inalintana ang mga problema at ang ano mang mga balakid dala ng pagkakahiwalay sa mga pamilya at ng pananatili sa isang kaibang kapaligiran at kultura  mabigyan lamang ng maayos kinabukasan ng kanilang mga mahal sa buhay.

Ang mabigyan ng magandang bukas o maayos ang kalagayan ng ating pamilya ay hindi magagawa ng sino mang Presidente ng Pilipinas kung tayo mismo na mga ama o ina ng tahanan ay hindi gagampanan ng maayos ang papel at responsibilidad bilang mga magulang. Katulad na lamang ng pagbigay ng kahandaan sa ating mga anak upang harapin ang bukas. Totoong may free education program ang pamahalaan subalit ito ay may limitasyon o hangganan.  At kung hanggang doon laman ang makamit na pag-aaral ng mga bata ito ay hindi sapat na makakapagbigay ng assurance para sa kanilang magandang kinabukasan. Kahit pa ba sila ay makatapos ng high school ng libre ito ay hindi  sapat upang makapagbigay sa kanila ng kinakailangang kakayahan upang harapin ng may kahandaan ang bukas. Ayon sa ating karanasan, kailangan pa rin ng mga bata ang at least vocational o technical education upang sila ay magkaroon ng kinakailangang skills o kahandan para makakuha ng magandang trabaho. Kung sila ay makakatapos ng kurso sa kolehiyo  ay lalong mas maigi.

Sa larangang ito ay nakakaungos ang ating mga OFWs at ako ay natutuwa. Ang kanilang may kalakihang kita ay siguradong sapat upang mapapunta sa kolehiyo ang mga bata at mapag-patapos ng kurso na magbibigay naman sa mga ito ng sapat na kahandaan upang harapin ang kinabukasan ng may kaayusan. Kahit papaano sila ay posibleng makakaiwas sa kahirapan at siguradong  sila ay makakatulong ng malaki sa pagpapaunlad ng ating bansa sa kinabukasan.

Ito ang ibig kung sabihin na hindi lamang sa sino mang mahahalal na Presidente nakasalalay ang pagkamit ng magandang kinabukasan ng ating bansa. Totoong malaki ang magagawa ng Presidente at ng lahat ng mga halal na opisyales ng pamahalaan upang mapabilis ang pag-unlad ng ating bansa. Subalit mas lalong mapapabilis ang pag-unlad nito kung ang bawa’t isa sa atin ay gagampanan ng maayos ang ating responsibilidad upang mapa-unlad naman ang kalagayan ng ating mga pamilya. At una dito ay ang pag-ayos sa kahandaan ng ating mga anak upang harapin ang kinabukasan sa pamamagitan ng pagbigay sa kanila ng tamang pag-aaral o edukasyon. Ito ang isang napakahalagang papel ng magulang na dapat natin gampanan ng husto. Kung ang ating mga anak at may mga kaukulang kahandaan upang harapin ang bukas lalong bibilis ang pag-unlad ng Pilipinas. At dito nakikita ko ang kahalagahan ng papel ng mga  Overseas Filipino Workers – ang ating mga Bagong Bayani.

Maraming salamat sa inyong patuloy na pagsubaybay.